اسلام آباد ۔ 19 نومبر (اے پی پی) حضوردے یوم ولادت دے موقع تے 2 ڈینہواراں دی عالمی رحمت اللعالمین کانفرنس (اج) منگل کوں شروع تھیسی، وزارت مذہبی امور دے اہتمام نال 2 ڈینھ دی سیرت کانفرنس دے مجموعی طور تے ترائے سیشن ہوسن ۔ افتتاحی اجلاس اچ وزیر اعظم عمران خان مہمان خصوصی ہوسن جڈاں جو(اج) منگل دی شام کانفرنس دے ڈوجھے سیشن اچ پاکستان سمیت بئے اسلامی ملکاں توں آئے جید علمائے کرام حضور نبی پاکدی سیرت طیبہ دے مختلف پہلوواں تے اظہار خیال کریسن ۔ 21 نومبر کوں سیرت کانفرنس دی اختتامی نشست اچ صدر مملکت ڈاکٹر عارف علوی مہمان خصوصی ہوسن۔اجوکے سال سعودی عرب، مراکش، مصر، ایران سمیت بئے اسلامی ملکاں توں وی مندوبین سیرت کانفرنس اچ شرکت کریسن۔اجوکے سال کانفرنس دا موضوع ”ختم نبوت اتے مسلماناں دی ذمے واریاں تعلیمات نبوی دی روشنی اچ “ ہے، تریجھے تے چھیکڑی سیشن اچ ہی صدر مملکت ڈاکٹر عارف علوی قومی اتے علاقائی زبان اچ کتب سیرت، نعت اتے مقالات سیرت تے مقابلیں اچ پہلے ،ڈوجھے تے تریجھے آونڑ آلیں کوں انعام ڈیسن ،رحمة اللعالمین ﷺکانفرنس اچ پورے ملک اچوں سارے مکتبہ ہائے فکر دے علماءکرام، سفارتکاراں، سول سوسائٹی اتے سیاسی اکابرین کو ں سڈیا گئے ۔ واضح رہے جو اجوکے سال حکومت حضوردے یوم ولادت کوں قومی سطح تے مناونڑدا فیصلہ کیتے جیں دا مقصد ساری دنیا تئیں آپ دے امن اتے محبت دے پیغام کوں پجاونڑ اے تے کانفرنس دا موضوع وی”ختم نبوت اتے مسلماناں دیاں ذمے واریاں تعلیمات نبوی دی روشنی اچ ‘ رکھیا گئے صاف واضح ہے جو ختم نبوت دے معاملے تے کوئی وی کلمہ گو کہیں قسم دا کوئی سمجھوتہ کائنی کر سگدا۔ ختم نبوت تے سارے عالم اسلام دااجماع ہے، ایں کوں نہ مننڑ آلا دائرہ اسلام توں خارج اے، آپ دا پیغام رحمت سارے مذہب ،سارے ادیان تے ساری مخلوق سانگے ہے ۔وزارت مذہبی امور دے ذرائع مطابق اجوکے سال دسمبر دے چھیکڑ اچ عالمی بین المذاہب کانفرنس کرائی ویسی جیں اچ جامعہ الازہر، امام کعبہ، پوپ یا انہاں دا کوئی خاص نمائندہ شرکت کریسی تے اے کانفرنس لاہور اچ تھیسی ۔ایندی صدارت وی وزیراعظم عمران خان کریسن ۔وزارت مذہبی امور دے مطابق اجوکے سال مختلف شہراں اچ پورے سال دے دوران سیرت دے پروگرام جاری رکھیسن۔
