تیزی نال ودھدے آبادی دے مسلے نال نبڑن کیتے اجتماعی کردار دی لوڑھ اے، وزیراعظم عمران خان دا تیزی نال ودھدی آبادی تے قابو پاونڑ سانگے لاءاینڈ جسٹس کمیشن ولوں قومی کانفرنس نال خطاب

اسلام آباد ۔ 5 دسمبر (اے پی پی) وزیراعظم عمران خان آکھیے جو حکومت تیزی نال ودھدی ہوئی ملکی آبادی دے مسلے توں آگاہ اے ،تیزی نال ودھدے آبادی دے مسلے نال نبڑن کیتے اجتماعی کردار دی لوڑھ اے، ودھدی آبادی بارے علماءکرام، ذرائع ابلاغ اتے معاشرے دے سارے طبقیاں کوں کردار ادا کرنڑا چاہیدے،پانامہ فیصلے قانون دی حکمرانی آلے نویں پاکستان دی بنیاد رکھ ڈتی اے،قانون دی حکمرانی اچ کوئی رکاوٹ نہ آونڑ ڈتی ویسی،پاکستان کوں ایں ویلھے بہوں وڈے چینلجزاتے مسائل درپیش ہین،یقین اے جوملک کوں سارے مسلیاں توں باہرو کڈھ گھنسوں۔اے گالھ وزیراعظم عمران خان تیزی نال ودھدی آبادی تے قابو پاونڑ سانگے لاءاینڈ جسٹس کمیشن ولوں اسلام آباد اچ تھیونڑ آلی قومی کانفرنس نال خطاب اچ آکھی۔وزیراعظم چیف جسٹس دا شکریہ ادا کریندے آکھیا جو پانامہ فیصلے ملک اچ قانون دی حکمرانی دا منڈھ بدھ ڈتے جیندے اگو ہنڑ کوئی رکاوٹ نئیں آسگدی،اج ملک اچ مہذب معاشرے دیاں جڑاں مضبوط کر ڈتیاں گین، کیوں جو ریاست مدینہ دی بنیاد وی قانون دی حکمرانی تے رکھی گئی ہئی جتھاں خلیفہ وقت وی عدالت کوں جوابدہ ہا۔ انہان آکھیے جو ملک اچ اصل جمہوریت اگو تے نئیں ودھ سگی کیوں جو اتھاں آمر جمہوریت پسند اتے جمہوریت پسند آمربنڑن چاہندا ہا۔ودھدی آبادی دے مسلے دے حل کیتے وی جمہوری حکمراناں کوں کم کرنڑاں چاہیدا ہا، جمہوری حکومتاں ملک اتے قوم دی بجائے صرف اپنڑے پنج سال دا سوچیندیاں رہین تہوں ڈیماں جھیں طویل امیعاد منصوبیاں دی بجائے وڈے کمیشناں آلے منصوبے بنڑدن۔ وزیراعظم عمران خان آکھیا جو سٹھ دے ڈھاکے اچ ایوب خان بہبودآبادی دی مہم شروع کیتی ہئی بھل بعد ایندے تے کہیں توجہ نئیں ڈتی۔وزیراعظم آکھیا جو اج ملکی ادارے پہلے توں ودھ آزاد ہین ، ایہا وجہ اے جو سی ڈی اے جیھاں ادارہ ہک وزیراعظم دے گھر دی ریگولرائزیشن سانگے عدالت کوں تفصیل ڈیندے، پہلے اے کم کڈاھیں سوچیا وی نہ ونج سگدا ہا۔انہان آکھیا جو ملک کوں مالی مشکلات اتے قرضیاں دا باردا سامنڑا اے،اساں انشاءاللہ انہاں مسلیاں اچوں نکل آسوں۔