وزیراعظم عمران خان دی کرسمس دے موقع تے مسیحی برادری کوں مبارخباد

اسلام آباد۔25 دسمبر (اے پی پی) وزیراعظم عمران خان کرسمس دے موقع تے اپنڑے ہک خصوصی پیغام اچ پاکستان اتے ساری دنیا دی مسیحی برادری کوں مبارخباد پیش کیتی ہے۔ انہاں آکھیے جویسوع مسیح کوں دنیا اچ انسانیت سانگے امن، محبت اتے شفقت دی علامت دے طورتے بھیجیا گیا اتے انہاں دے پیغام امید اتے معافی ابدی نجات دا رستہ روشن کر ڈتا۔ وزیراعظم آکھیا جو یسوع مسیح دی تعلیمات ساری دنیا اچ کروڑاں انساناں دی امن تے خوشحالی سانگے ہن ۔ انہاں آکھیا جو کرسمس اللہ سائیںدیاں نعمتاں توں لطف اندوزتھیونڑ اتے خوشحالی دا موقع ہے۔ انہاں آکھیا جو کرسمس دا ڈینھ اساکوں سختیاں اتے مشکلاں دا سامنڑاں کرنڑ آلے لوکیں دی مدد دادرس وی ڈیندے۔ وزیراعظم آکھیا جو ایہ ڈینھ اساکوں اپنڑیاں ذمہ داریاں دی یاد ڈیوندے جو انسان ہونڑ دی حیثیت نال اساکوںبئے انساناں دی مشکلاںمکاونڑ سانگے اپنڑاں کردار ادا کروں۔ انہاں آکھیا جو خوشی دے ایں موقع تے اساں اپنڑے مسیحی بھراواں دے نال ہسے ۔انہاں آکھیا جو پاکستان تحریک انصاف دی حکومت بین المذاہب ہم آہنگی دے فروغ دی داعی ہے۔ وزیراعظم آکھیا جو مسیحی برادری اساڈے معاشرے داہک لازم جز ہے اتے اساںملک دی سماجی تے اقتصادی ترقی اچ انہاں دی سانجھداری تے فخر کریندوں۔ انہاں آکھیا جو اساڈے ملک دا تنوع در حقیقت اساڈیاں طاقتاں وچوں ہک ہے۔ وزیراعظم زور ڈتا جو موجودہ حکومت ملک اچ وسنڑ آلیاں ساریاںاقلیتاںدے حقوق دے تحفظ سانگے پرعزم ہے اتے انہاں دے حقوق دے تحفظ دی ضمانت ڈیندی ہے۔ انہاں آکھیا جو اساڈا آئین وی قائداعظم محمدعلی جناحؒ دے نقطہ نظر دی تشریح کریندے جیندے اچ انہا ںپاکستان اچ وسنڑ آلے سارے مذہباں دے منڑ آلیاں سانگے مساوات ، آزادی اتے تحفظ دی پالیسی دااظہار کیتا ہا۔ وزیراعظم آکھیا جوکرسمس دے ڈینھ اساکوںخوشیاں دے موقع تے پاکستان کوں ہک مٹھ کرنڑ سانگے رل مل تے کم کرنڑ دا عزم کرنڑ پوسی ،تاں جو ملک اچ امن، خوشحالی اتے سماجی تے معاشی ترقی سانگے نویں پاکستان دے وژن مطابق عمل کیتا ونج جا سگے۔