اسلام آباد ۔ 8 دسمبر (اے پی پی)صدرمملکت ڈاکٹرعارف علوی آکھیے جو ایوان صدرکوںعوام سانگے کھولنڑ دا مقصد ایوان صدر اتے عوام وچال فاصلے گھٹ کرنڑ ہے، اساڈی دعوت تے ایوان صدرآونڑ آلے لوکا ں داخیرمقدم کریندا ہاں، تریخی نوعیت دیاں شئیں اتے دستاویزات کوں وی ایوان صدر اچ عوام سانگے رکھنڑ چاہندوں ،کہیں دا مخالف کائنی ہاں ، صدردا عہدہ وفاق دی علامت ہے، ایوان صدردے دفتراں کوں وی عوام سانگے کھولنڑ دی خواہش ہے، ایوان صدر اچ طلباءدے مطالعاتی دوراں داخیرمقدم کریندوں، بوہے کھلے ہن۔ انہاں خیالیں دا اظہارصدر مملکت ہفتہ کوں اتھاں ایوان صدر اچ میڈیااتے یوان صدرڈیکھنڑ سانگے آونڑ آلے شہریاں نال گالھ بات کریندے ہوئیں کیتا۔خاتون اول ثمینہ علوی وی ایں موقع تے صدرمملکت دے کٹھے ہن۔صدر مملکت نمازظہر دے بعد ایوان صدر اچ آونڑآلے لوکاں نال گھل مل گئے۔شہریاں ایں موقع تے صدر دا فقیدالمثال خیرمقدم کیتا۔ایں موقع تے میڈیا اتے شہریاں نال گالھ بات کریندے ہوئیں صدر مملکت آکھیاجواوہ اج اتھاں آونڑ آلے شہریاں داخیرمقدم کریندن۔انہاں آکھیا جواج سویل توں ہی ایوان صدر اچ بالاں دے کھیڈن دے مناظر اتے انہاں دایاں آوازاں آندیاں پی ہن۔ صدرآکھیا جو شہریاں اج نظم وضبط دامظاہرہ کیتے، ایوان صدرخوبصورت جاءہے اتے میں اتھاں آونڑ آلے سارے شہریاں داخیرمقدم کریندا ہاں،جیرھا جو اساڈی دعوت تے اتھاں آئے۔صدر آکھیا جوکوشش ہے جو مہینے اچ ڈوواری ایوان صدر کوں عوام سانگے کھولیا ونجے،اساں انتظام ٹھیک کرنڑ دی کوشش کریندے پئے ہسے ۔ ایوان صدر دے برابر ہک پارک ہے ، کوشش کریسوں جو ایں پارک کوں مستقل طورتے عوام سانگے کھول دتا ونجے ، ایں ضمن اچ سی ڈی اے دے نال گالھ کریسوں تاں جو ہفتہ اچ 5 یا 6ڈینھ پارک عوام سانگے کھلا رہوے۔صدرمملکت آکھیا جوانہاں دی خواہش ہے جو اتھاں آونڑ آلے لوک سارے ایریا اچ گھوم پھر سگن۔انہاں آکھیا جوایوان صدر اچ ا وہ تاریخی ہال وی ہے جتھاں صدر،وزرائے اعظم ، وزرائ، چیف جسٹس اتے آئینی اداریاں دے سربراہان حلف گھندن ۔ انہاں آکھیا جو عوام کوں تریخی عمارتاں،شئیں اتے دستاویزات ڈیکھنڑ چاہیدیاں ہن۔ کوشش کریسوں جو آئین پاکستان دی دستاویز کوں وی اتھاں عوام سانگے رکھیا ونجا ،ایں طرح کراچی اچ بابائے قوم قائداعظم محمد علی جناح اتے قائدملت لیاقت علی خان دیاں شئیں کوں وی اتھاں عوام سانگے رکھنڑ دے ضمن اچ اقدامات کیتے ویسن۔ایوان صدر کوںعوام سانگے کھولنڑ دے اقدام داذکرکریندے ہوئیں صدر مملکت آکھیا جو ایندا مقصد 70 سلاں توں ایوان صدر اتے عوام وچال فاصلے گھٹ کرنڑ ہے، اساں چاہندوں جو حکومت اتے عوام وچال تعلق قائم رہوے۔ انہاں آکھیاجو اج 8 توں 10 ہزار لوک ایوان صدر آئے، اتھاں پانڑیں دا مسئلہ پیش آیا تاں جو اینکوں فوری حل کرگھدا گئے، آئندہ انتظامات کوں ٹھیک کرنڑ دی کوشش کریسوں۔اتھاںعوام سانگے سہولتاں ہونڑ چاہیدیاں ہن، میکوں خوشی ہے جو اج عوام ڈسپلن دا مظاہرہ کیتا۔ صدر مملکت آکھیا جوا وہ سکولاں اتے کالجاں دے طلباءدے ایوان صدر دے تفریحی دوراں داخیرمقدم کریسن، مطالعاتی دوراں سانگے ایوان صدر دے بوہے کھلے ہن۔ہک سوال دے جواب اچ انہاں آکھیا جوشہریاں ولوں موبائل فون ایوان صدرنہ گھن آونڑ ڈیونڑدی شکایت دے حوالے نال اقدامات کیتے ویسن ، میں عوام سانگے انتظامات کرنڑ تے ایوان صدر دے عملے دے تعاون دا وی مشکور ہاں۔ ہک سوال تے صدرمملکت نآکھیا جواوہ کہیں دے مخالف کائنی ، صدردا عہدہ وفاق دی علامت ہے، صدر ساریاںسیاسی جماعتاں اتے سارے شہریاں دا صدر ہوندے۔ صدر مملکت آکھیا جو مستقبل اچ بزرگ شہریاں سانگے الیکٹرک کاردابندوبست کیتا ویسی۔
