اسلام آباد ۔08 دسمبر(اے پی پی)سپیکرقومی اسمبلی اسد قیصر آکھیے جو پاکستان اتے ایران برادر اسلامی ہمسایہ ملک ہن، ڈوہائیں ملک اسلامی روایتاں، ثقافت اتے ہمسائیگی دے لازوال رشتے اچ بدھے ہوئے ہن۔ انہاں خیالیں دا اظہار انہاں تہران اچ ڈوجھی سپیکرز کانفرنس دے موقع تے اپنڑے ایرانی ہم منصب ڈاکٹر علی لاریجانی نال ملاقات دوران گالھ بات کریندے ہوئیں کیتا۔ ملاقات اچ ڈوطرفہ علاقائی سلامتی اتے سانجھی دلچسپی سمیت بئے اہم امور تے تبادلہ خیال کیتا گیا۔ سپیکر قومی اسمبلی آکھیاجو پاکستان ایران اتے بئے یار ملکاں دے نال اپنڑے تعلقات کوں قدر دی نظر نال ویکھدے۔ انہاں آکھیا جو جنوبی ایشیاءدے ملکاں کوں اپنڑے مسئلیاں کوں خاص طور تے حل کرنڑ سانگے سانجھیاں کوششاں اچ بی تکھائی گھن آونڑ پوسی۔ انہاں آکھیا جو خطے اچ امن تے سلامتی کوں چنگا بنڑاونڑ ، علاقائی ترقی اتے معیشت کو ںمضبوط کرنڑ سانگے خطے دے سارے ملکاں کوں خصوصی اقدامات کرنڑ پوسن۔انہاں آکھیا جو مضبوط معیشت کہیں وی ملک دی ریڑھ دی ہڈی سمجھی ویندی ہے، اساکوں ودھ توں ودھ سرمایہ کاری دے ذریعے اپنڑے ملکاں دی معیشت کوں بیا مضبوط کرنڑ دی ضرورت ہے۔ سپیکر آکھیا جو ایںکانفرنس ورگے اہم پلیٹ فارم دے ذریعے نال اساکوں اپنڑے خطے دی معاشی استحکام سانگے ہنگامی بنیادیں تے اقدامات کرنڑ دی ضرورت ہے۔ انہاں آکھیا جو دہشت گردی تے انتہا پسندی خطے دی ترقی اچ آونڑ آلی سبھ توں وڈی رکاوٹ ہے،ایں ناسور کوں مکاونڑ سانگے خطے دے سارے ملکاں کوں سانجھیاں کوششاں کرنڑ پوسن۔ ڈاکٹر علی لاریجانی سپیکر قومی اسمبلی دا سپیکرز کانفرنس اچ شریک تھیونڑ تے شکریہ ادا کیتا۔ انہاں آکھیا جو ایران اپنڑے ہمسایہ ملک پاکستان دے نال اپنڑے قریبی اتے دوستانہ تعلقات کوں بہوں اہمیت ڈیندے، ایران پاکستان دے نال سارے شعبیں اچ تعاون جاری رکھنڑ دا خواہشمند ہے، خطے اچ سلامتی، علاقائی ترقی اتے معاشی استحکام سانگے ایران پاکستان دے نال تعاون جاری رکھیسی۔ انہاں آکھیا جو جنوبی ایشیاءاچ امن دے قیام، علاقائی ترقی اتے معیشت دی چنگائی سانگے سارے ملکاں کوں پارلیمانی اتے سفارتی شعبیں اچ بئی تکھائی گھن آونڑ پوسی۔ انہاں آکھیا جو دہشت گردی خطے دی ترقی سانگے سبھ توں وڈا خطرہ ہے جیندے نال نبڑن سانگے سانجھی کوششاں دی ضرورت ہے۔
