اسلام آباد ۔ 20 دسمبر (اے پی پی) وزیر خارجہ شاہ محمود قریشی ایوان بالا اچ کرتار پور راہداری تے بھارتی وزیر خارجہ دے بیان بارے سینیٹر میاں رضا ربانی دے توجہ دلاﺅ نوٹس تے الویندے ہوئے آکھیے جو کرتار پور بارڈر سکھاں دے مطالبے تے کھولیا گئے،مذاکرات ہی پاکستان اتے بھارت دے حل طلب مسلیاں دا ہکو رستہ ہین، پاکستان اچ مذہبی آزادی تے کوئی پابندی نئیں،پاکستان کوں داغدار کرنڑ اتے دباﺅ کیتے کہیں ویلھے بلیک لسٹ اتے گرے لسٹ اچ پاونڑ جھیں ہتھکنڈے استعمال کیتے ویندن،کشمیر دے مسلے تے ڈٹ تے کھڑے ہیں،ایں سانگے اقوام متحدہ دے سیکرٹری جنرل، او آئی سی دے سیکرٹری جنرل اتے انسانی حقوق کمیشن دے حکام کوںخط لکھین، طالبان کوں نہ منڑ والا امریکا اج مذاکرات کرنڑ تے مجبور اے،چین، سعودی عرب اتے یو اے ای نال تعلقات ودھین۔وزیر خارجہ آکھیا جو سماجی و اقتصادی صورتحال دی بہتری کیتے مستحکم اتے پر امن ہمسائیگی ساڈی لوڑھ اے، بھارت کوں دہشت گردی مکاونڑ کیتے پاکستان ولوں ادا کیتی ونجنڑ آلی قیمت دا احساس ہوونڑا چاہیدے، ساکوں کشمیر اتے پاکستان دا جھنڈا ہتھ اچ چاءتے اظہار یکجہتی کرنڑا چاہیدے،جگ اچ انسانیت اتے انسانی حقوق دے علمبرداراں دی توجہ ایں بارے ڈیواونڑی چاہیدی اے۔ انہاں آکھیے جو ساڈی خارجہ پالیسی اے ہے جو اج پاکستان تے گالھیں کرنڑ آلے اوندیاں تعریفاں کریندے کھڑن، اج چین اتے پاکستان وچال تعاون ودھیے،سعودی عرب اتے یو اے ای وچال تعلقات بئے مضبوط تھین، جنوری اچ متحدہ عرب امارات دے ولی عہد اتے فروری اچ سعودی عرب دا اعلیٰ سطح دا کاروباری وفد پاکستان دا دورہ کریسی، یو اے ای توں وی پاکستان کیتے اقتصادی پیکج تیکھے ملنڑ دی توقع اے ،23 مارچ کوں ملائیشیا دے وزیراعظم مہاتیر محمد اتے ملائیشیا دا کاروباری وفدوی پاکستان آسی۔
