ملکی وسائل توں فیدہ چاونڑ دی لوڑھ اے،بنھاں تے انحصار دی پالیسی چھوڑنا ہوسی،وزیراعظم عمران خان

اسلام آباد ۔ 28 دسمبر (اے پی پی) وزیراعظم عمران خان وزارت خارجہ، بیرون ملک تعینات سفیراں، وزارت داخلہ اتے متعلقہ اداریاں وچال موثر اتے مربوط رابطے ودھاونڑ تے زور دیندے ہوئے آکھیے جو ملکی وسائل توں فیدہ چاونڑ دی لوڑھ اے ساکوںبنھاں تے انحصار دی پالیسی چھوڑنا ہوسی،وزارت خارجہ، بیرون ملک تعینات سفیراں، وزارت داخلہ اتے متعلقہ اداریاں وچال موثر اتے مربوط رابطوے ودھاونڑے چاہیدن،بیرونی سرمایہ کاری دا ودھارا،نویں منڈیاں گولنڑ کیتے برآمدات اچ ودھارا اتے وپار اچ سوکھ اتے منی لانڈرنگ روکنڑترجیحات ہین۔اے گالھ انہاں دفتر خارجہ اچ ڈو ڈیہاڑی معاشی سفارتکاری کانفرنس دی اختتامی تقریب نال خطاب اچ آکھی ۔انہاں آکھیے جو اج دا مالیاتی بحران ساڈے کیتے وڈا موقع اے جیندے نال اے پتا لگسی جو پاکستان ہنڑ ایویں نئیں چل سگدا،جیکر اساں بحراناں توں نکلڑے تاں اپنڑی سوچ بدل تے بنھاں انحصار مکاونڑا ہوسی،ساکوں قرض دی بجائے اپنڑی معیشت دیاں خرابیاں مکاونڑیاں چاہیدن، اساں قرض گھن تے اپنڑی عزت نفس کوں نقصان پچیندے پئے ہیں، قرض پاروں قوماں محروم اتے عوام غریب تھیندن۔وزیراعظم آکھیے جو ملک دی اشرافیہ اتے وزرائے اعظم جگ اچ ساڈا تاثر خراب کیتے اتے پیسے گھنڑ کیتے مسلم دنیا کوں لبرل اتے بنیاد پرست اچ ونڈیے۔وزیراعظم وزارت خارجہ کوں ہدایت کیتی جو او اپنڑی سوچ بدلے ،ساڈے سفیراپنڑی ذمہ داری نبھاون اتے ہک ٹیم ورک آلی کار کم کرن، مختلف محکمے وی آپسی رابطے ودھاون، ساڈے سفیر سمندر پار پاکستانیاں نال چنگا رویہ رکھن،بیرون ملک مقیم پاکستانی کاروباری شخصیات دی فہرست بنڑاون تاں جو او ملک دی ترقی اتے سرمایہ کاری کیتے اپنڑا ہتھ ونڈا سگن۔انہاں بیرون ملک ہنر منداں، برآمدات اچ ودھارے،وپاری سرگرمیاں، سرمایہ کاری، تجارت اتے روزگار کیتے نویں موقع گولنڑ دی ہدایت کیتی۔