ملک اچ معاشی ترقی اتے روزگار کیتے سرمایہ کاری ودھاونڑی ہوسی،وزیراعظم عمران خان دا خیبرپختونخواحکومت دی 100ڈینہہ دی کارکردگی بارے تقریب نال خطاب

APP91-14 PESHAWAR: December 14 - Prime Minister Imran Khan addressing 100 Days event of Khyber Pakhtunkhwa Government. APP

پشاور۔14 دسمبر (اے پی پی)وزیراعظم عمران خان آکھیے جڈاں پاکستان اچ سرمایہ کاری نہ ہوسی ، روزگار وی نئیں نکل سگدا،ملک اچ معاشی ترقی اتے روزگار کیتے سرمایہ کاری ودھاونڑی ہوسی،نویںپاکستان اچ کم کرنڑاں پوسی،جیندی حاضری اتے کارکردگی نہ ہوسی اون وزیر توں وزارت ولا گھنسوں، کم نہ کرنڑ آلا بیوروکریٹ وی عہدے تے نہ راہسی،مہمند اتے بھاشا ڈیم کیتے پیسے کٹھے کریندے پئے ہیں،شریف برادران دی کارکردگی صرف کاغذاں اتے اشتہاراں تئیں ہئی،اگیں ساکوں روز ڈو مور آکھنڑ آلا امریکا اج طالبان نال الواونڑ کیتے ساڈے توں مدد کیتے منتاں کریندا کھڑے۔ اے گالھ وزیراعظم عمران خان خیبرپختونخواحکومت دی 100ڈینہہ دی کارکردگی بارے تقریب نال خطاب کریندے آکھی۔انہاں وزیراعلیٰ خیبر پختونخوادی ترائے مہینے دی کارکردگی دی تعریف کریندے عوامی بھلائی کیتے اقدامات تے شاباش ڈتی جو عثمان بزدار آلی کار وزیراعلیٰ خیبرپختونخوامحمودخان وی کہیں دے تلے نئیں لگدے۔انہاں پشاور اچ شیلٹر ہوم بنڑاونڑ تے وی وزیراعلیٰ کے پی کے کوں مبارک ڈتی۔انہاں آکھیے جو 2018ءدے عام انتخابات دے بعد اج پہلی واری پشاور اچ بطوروزیراعظم خطاب کریندا پیاں،کے پی کے دے عوام پی ٹی آئی کوںکارکردگی تے ولا مینڈیٹ ڈتے کیوں جو ودھ سیاسی شعور رکھیندن، صوبے دے لوکاں کوں تبدیلی ڈسی اے تہوں انہاںولا موقع ڈتے۔ انہاں آکھیے جو چیلنجاں دے باوجوددحکومت معاشی صورتحال سدھارنڑ کیتے کم کریندی پئی اے، عوام تھوڑا سبر کرن، انشا اللہ پھل وی میٹھا ہی ملسی، ساڈا مقصد عام لوکاں دا جیونڑسوکھا کرنڑ، صحت، تعلیم، روزگارڈیونڑ اے تاں جو امیر غریب دا فرق مکے،ہکو جھیاں نصاب تعلیم ہووے،ساڈاوژن لوکاں دی خدمت اتے ریاست مدینہ آلی کار حقوق اتے انصاف دی فراہمی اے۔وزیراعظم آکھیے جو ہنڑ ساکوں فارورڈبلاک دا وی خطرہ نئیں، اگیں ڈر ہوندا ہا جیکر کہیں وزیر دے خلاف کارروائی کیتی تاں چھوڑ نہ ونجے،ہنڑ جیہڑا وزیر کم نہ کریسی گھر ویسی،کم نہ کرنڑ آلے بیورو کریٹ کوں وی کوئی رعایت نہ ڈیسوں،اوکوں باھرو کڈھیسوں۔پاک امریکا تعلقات بارے وزیراعظم آکھیا جو ماضی اچ ہر ویلھے ڈو مور ڈومور دی رت لاونر آلا امریکا اج طالبان نال الواونڑ کیتے ساڈی مدد کیتے ہتھ بدھی کھڑے۔ انہاں آکھیا جو پشاور کوں تجارتی اتے سیاحتی مرکز بنڑیسوں، قلعہ بالاحصاراچ وی سیاحت ودھائی ویسی،فرنٹیئرکور کوں بئی جاہ تے زمین ڈیسوں، حکومت حکومت قبائلی علاقیاں دی ترقی کیتے روڈمیپ بنڑیندی پئی اے، مہمند ڈیم بنڑن نال پشاوردا پانڑی دا مسلہ ہمیشہ کیتے حل تھی ویسی۔