نینگر نسل کوں تعلیمی انقلاب دے ذریعے بہترین مستقبل ڈیونڑ وفاقی حکومت دا پہلا مشن اے ، وفاقی وزیرمنصوبہ بندی، ترقی و اصلاحات مخدوم خسرو بختیار دا اجلاس نال خطاب

اسلام آباد ۔ 3 دسمبر (اے پی پی) وفاقی وزیرمنصوبہ بندی ،ترقی واصلاحات مخدوم خسرو بختیار آکھیے جو پاکستان وژن 2025ء دے تحت نینگر نسل کوں تعلیمی انقلاب دے ذریعے بہترین مستقبل ڈیونڑ وفاقی حکومت دا مشن اے ،موجودہ حکومت مقامی سطح تے اعلیٰ تعلیمی اداریں دا ہک نیٹ ورک قائم کریندے ہوئیں عوامی سہولتاں اچ ودھارے دے رستے تے ٹردا پئے ،وژن 2025اچ تعلیمی ترقی کوں پہلی حیثیت ڈتی گی اے تے پاکستان دے سارے ضلعیں دی سطح دے یونیورسٹی سب کیمپس دا قیام علاقائی ترقی دے رستے تے اہم قدم ثابت تھیسی۔پورے ملک اچ تعلیم دے شعبے کوں بہتر کرنڑ کیتے موجودہ حکومت ملک اچ ہکو جیہا تعلیمی نصاب رائج کرنڑ تے عمل کریندی پئی اے ۔اے گال انہاں گزریل ڈینھ سنٹرل ڈےوےلپمنٹ ورکنگ پارٹی دے اجلاس نال خطاب کریندے ہوئیں آکھی ۔اجلاس اچ وفاقی وزارتاں اتے صوبائی محکمیں دے اعلی حکام شرکت کیتی۔اجلاس اچ تعلیم ، ذرائع ابلاغ اتے علاقائی ترقی متعلق منصوبے پیش کیتے گے ۔سی ڈی ڈبلیو پی دے اجلاس اچ ایجوکیشن ڈو یژن ولوں 2 منصوبے پیش کیتے گن جیں اچ پہلا منصوبہ پائیدار ترقی دے مقاصد دے حصول کیتے وفاقی دارلحکومت ، گلگت بلتستان ، فاٹا اتے آزاد کشمیر دی مقامی کمیونٹی کوں بنیادی تعلیم دیاں سہولتاں ڈیونڑ تے تعلیمی شعبے متعلق انسانی ترقی دے انڈیکیٹرز کوں بہتر کرنڑ اچ مدد فراہم کرنڑ سانگے 2 ارب 60 کروڑ روپے مختص کیتے گن جیں دی اجلاس اچ منظوری ڈتی گی ۔