اسلام آباد ۔ 30دسمبر (اے پی پی) وزیراعظم عمران خان ترکی دے صدر رجب طیب اردوان دی دعوت تے 3 اتے 4 جنوری کوں ترکی دا دورہ کریسن ۔ دفتر خارجہ توں اتوار کوں جاری بیان دے مطابق وزیراعظم عمران خان دا ترکی دا اے پہلا دورہ ہوسی ۔انہاں دے رلے وزیر خارجہ شاہ محمود قریشی، وزیر منصوبہ بندی مخدوم خسرو بختیار، وزیراعظم دے مشیر عبدالرزاق داﺅد ہوسن۔ دورے دے دوران وزیراعظم ترکی دے صدر رجب طیب اردوان دے نال ملاقات کریسن ۔ ملاقات اچ ڈوہیں ملکاں وچال مجموعی تعلقات دا جائزہ گھدا ویسی ۔ایندے علاوہ علاقائی تے بین الاقوامی صورت حال متعلق معاملات زیر غور آسن ۔وزیراعظم عمران خان ترکی اچ بزنس فورم نال خطاب دے علاوہ ترک تاجراں اتے سرمایہ کاراں نال انقرہ اچ ملاقات کریسن ۔ وزیراعظم دے دورہ ترکی نال ڈوہیں ملکاں دیاں حکومتاں تے عوام وچال برادرانہ تعلقات مزید ودھ ویسن ۔ایندے علاوہ ایں دورے دے نتیجے اچ خاص طور تے اقتصادی، تجارتی اتے سرمایہ کاری ڈے شعبیں اچ نویں رستے کھلسن تے تعاون اچ مزید ودھارا تھیسی۔
