وزیراعظم عمران خان ہک ڈینھ دے دورے تے کراچی پج گئے،پاکستان اسٹاک ایکسچینج دے چیئرمین سلیمان مہدی دی سربراہی اچ عہدیداراں تے مشتمل وفد دی ملاقات تحریک انصاف دی حکومت ملک اچ تجارت اتے سرمایہ کاری کوں فروغ اتے تحفظ ڈیونڑچاہندی ہے، باہرلے ملکاں دے سرمایہ کار پاکستان اچ سرمایہ لیندے پن ، تجارت، سرمایہ کاری اتے برآمدات دے فروغ سانگے تاجراں اتے سرمایہ کاراں دی تجویزاں دا خیرمقدم کریسن وزیراعظم عمران خان دی پاکستان اسٹاک ایکسچینج دے وفد نال ملاقات دوران گالھ بات

کراچی۔ 9 دسمبر (اے پی پی) وزیراعظم عمران خان آکھیے جو پاکستان تحریک انصاف دی حکومت ملک اچ تجارت اتے سرمایہ کاری کو ںفروغ اتے تحفظ ڈیونڑچاہندی ہے، تجارت، سرمایہ کاری اتے برآمدات دے فروغ سانگے تاجراں اتے سرمایہ کاراں دی تجویزاں دا خیرمقدم کریسن۔ وزیراعظم انہاں خیالیں دااظہاراتوار کو ں اتھاں پاکستان اسٹاک ایکسچینج دے چیئرمین سلیمان مہدی دی سربراہی اچ سٹاک ایکسچینج دے عہدیداراں اتے اسٹاک برو کرز تے مشتمل وفد نال ملاقات اچ گالھ بات دوران کیتا ۔ وزیر خزانہ اسد عمر ، وزیر منصوبہ بندی مخدوم خسرو بختیار ، وزیر آبی وسائل فیصل واوڈا، وزیر بحری امور علی زیدی، وزیر انفارمیشن ٹیکنالوجی ڈاکٹر خالد مقبول صدیقی ، گورنر سندھ عمران اسماعیل، وزیر مملکت حماد اظہر، مشیر وزیر اعظم ڈاکٹر عشرت حسین، وزیر اعظم دے معاون خصوصی نعیم الحق اتے افتخار درانی وی ملاقات اچ موجود ہن۔ وزیراعظم آکھیا جو انہاں دی حکومت ہک مختلف سوچ گھن تے آئی ہے ،اساں بزنس اتے سرمایہ کاری کوں فروغ، تحفظ اتے مارکیٹ اچ استحکام گھن آونڑ چاہندوں۔انہاں وفد کوں مخاطب کریندے ہوئیں آکھیا جو تساڈے کنوں آیا ہاں جو تساںاساکوں تجویزاں ڈیوو۔ انہاں آکھیا جوباہرلے ملکاں دے سرمایہ کار پاکستان اچ سرمایہ لیندے پن ، سرمایہ کار پاکستان اچ سرمایہ کاری اچ وڈی دلچسپی دا اظہارکریندے پن۔ وزیراعظم آکھیا جو پاکستان اچ سرمایہ کاری دے حوالے نال استعدادکارموجود ہے ۔ ایں موقع تے وفد دے ارکاناں وزیر اعظم کوں عہدہ سانبھنڑ تے مبارخباد ڈتی اتے ملک اچ مالی استحکام اتے چنگی کارکردگی تے حکومت دی مالیاتی ٹیم دی تعریف کیتی۔ وفد وزیر اعظم کوں سٹاک بروکرز اتے اسٹاک مارکیٹ دے حوالے نال بئے اموربارے ڈسایا اتے مالیاتی استحکام سانگے تجویزاں پیش کیتیاں ، وزیراعظم ودھ ساریاںتجویزاں منظور کیتیاں۔ وفد حکومت دی مالیاتی پالیسی تے حکومت کوں مکمل تعاون کرنڑ دا یقین ڈیوایا ۔ ملاقات اچ ٹیکس بیس کوں ودھاونڑ، اسٹاک مارکیٹاں اچ انفارمیشن ٹیکنالوجی دے استعمال اتے غیر قنونی ادائیگیاں کوں روکنڑ تے اتفاق کیتا گیا۔ قبل ازیں وزیراعظم عمران خان ہک ڈینھ دے دورے تے کراچی پجے تاں گورنر سندھ عمران اسماعیل اتے پارٹی رہنماواں انہاں دا استقبال کیتا۔ وزیراعظم نال گورنر ہاﺅس اچ گورنر سندھ ملاقات کیتی اتے انہاں صوبے دی ترقی توں متعلق امور تے تبادلہ خیال کیتا۔