اسلام آباد ۔ 11 دسمبر (اے پی پی) وفاقی وزیر برائے پٹرولیم غلام سرور خان تیل تے گیس دے مقامی ذخائر دی گول اتے پیدوار دی لوڑھ تے زور ڈیندیں ہوئیں آکھیا جو ملک کوں پٹرولیم دے مقامی ذخائر دی پائیدار ترقی تے سپلائی دی لوڑھ اے،اجوکی حکومت ملک دے درآمدی بل تے قابو پاونڑ سانگے بئے پٹرولیم بلاکس متعارف کرویسی۔اے گالھیں انہاں منگل کوں تیل تے گیس دی گول اتے پیدوار کوں ودھاونڑ بارے چیلنجز اتے حکمت عملیاں بارے سالانہ ٹیکنیکل کانفرنس نال خطاب کریندیں ہوئیں آکھی۔کانفرنس دا اہتمام پاکستان ایسوسی ایشن آف پٹرولیم جیو سائنٹسٹس اینڈ سوسائٹی آف پٹرولیم انجینئرز پاکستان کیتا ہئی۔انہاں آکھیا جو گزریل مہینے تیل تے گیس دی گول بارے بلاکس دے حصول اچ کمپنیاں دی شرکت حوصلہ افزاءاے،اے سرمایہ کاراں دے اعتماد اتے مستقبل اچ ایکسپلوریشن دے لائسنساں اچ دلچسپی ظاہر کریندی اے۔ایں موقع تے سیکرٹری پٹرولیم میاں اسد حیاءالدین آکھیا جو کانفرنس اچ ماہرین دی شرکت نال ملک اچ پٹرولیم دے ذخائر دی دریافت اتے پیداوار ودھاونڑ بارے حکمت عملیاں اتے جدید طریقیاں بارے آگاہی تھیسی۔کانفرنس اچ تیل تے گیس دے شعبہ توں 40کمپنیاں دے نمائندے اتے اندرلے اتے باہرلے ملک توں 1500مندوبین شریک تھیندے پن۔
