جسٹس آصف سعید کھوسہ 26 ویں چیف جسٹس آف پاکستان دے عہدے دا حلف چا گھدا،صدر مملکت ڈاکٹر عارف علوی ایوان صدراچ منعقدہ تقریب اچ انہاں توں حلف گھدا

اسلام آباد ۔ 18 جنوری (اے پی پی) جسٹس آصف سعید کھوسہ 26 ویں چیف جسٹس آف پاکستان دے عہدے دا حلف چا گھدا۔ صدر مملکت ڈاکٹر عارف علوی جمعے کوں ایوان صدر اچ منعقدہ تقریب اچ انہاں توں حلف گھدا۔ حلف برداری دی تقریب اچ وزیراعظم عمران خان، سپریم کورٹ دے جج صاحبان، وفاقی کابینہ دے ارکان، سپیکر قومی اسمبلی اسد قیصر، چیئرمین سینٹ صادق سنجرانی، سروسز چیفس، گورنرز، وکلاءاتے بئی نمایاں شخصیات شرکت کیتی۔ چیف جسٹس آصف سعید کھوسہ 21 دسمبر 1954ءکوں ڈیرہ غازی خان اچ جمیے ۔ انہاں 1969ءاچ بورڈ آف انٹرمیڈیٹ اینڈ سکینڈری ایجوکیشن ملتان توں میٹرک کیتا تے بورڈ اچ 5 ویں پوزیشن حاصل کیتی۔ انہاں 1971ءاچ بورڈ آف انٹرمیڈیٹ اینڈ سکینڈری ایجوکیشن لاہور توں انٹرمیڈیٹ دے امتحان اچ پہلی پوزیشن حاصل کیتی۔ انہاں1973ءاچ گورنمنٹ کالج لاہورتوں بی اے دی ڈگری حاصل کریندے ہوئیں پہلی پوزیشن حاصل کیتی بعد اچ 1975ءاچ یونیورسٹی آف پنجاب توں انگلش لینگوئج تے لٹریچر اچ ماسٹرز کیتا۔ 1978ءاچ کوئنز کالج‘ یونیورسٹی آف کیمبرج برطانیہ توں ایل ایل ایم کیتا۔ جسٹس آصف سعید کھوسہ 13 نومبر 1979ءکوں لاہور ہائیکورٹ جڈاں جو 12 ستمبر 1985ءکوں سپریم کورٹ دے ایڈووکیٹ دی حیثیت نال انرول تھے۔ او آئین تے قانون دے حوالے نال کئی کتاباں دے مصنف وی ہن جڈاں جومختلف آئینی و قانونی مسلیں تے انہاں دے بہوں سارے مضمون تے تحقیقی مقالے وی شائع تھئن۔ چیف جسٹس 21 مئی 1998ءاچ لاہور ہائیکورٹ جڈاں جو 18 فروری 2010ءکوں سپریم کورٹ دے جج تعینات تھے۔ انہاں ہنڑ تئیں تقریباً 19 سالاں دے اپنڑے کیریئر دے دوران تقریبا 55 ہزار مقدمیں دے فیصلے کیتن۔ او مختلف ملکاں اچ بین الاقوامی کانفرنساں تے سیمیناراں اچ پاکستان دی نمائندگی کر چکن ۔