منی بجٹ پیش؛ بینکنگ ٹرانزیکشنز تے فائلرزکیتے ود ہولڈنگ ٹیکس ختم،1800 سی سی توں وڈیاں گاڈیاں تے ٹیکس دی شرح ودھائی ویسی،عوام کوں گھر بنڑاونڑ کیتے قرض حسنہ ڈیونڑ سانگے پنج ارب روپے مختص کرنڑ دی تجویز

اسلام آباد۔23جنوری( اے پی پی)وزیر خزانہ اسد عمر قومی اسمبلی اچ منی بجٹ پیش کر ڈتے۔ بینکنگ ٹرانزیکشنز تے فائلرزکیتے ود ہولڈنگ ٹیکس ختم،1800 سی سی توں وڈیاں گاڈیاں تے ٹیکس دی شرح ودھائی ویسی،عوام کوں گھر بنڑاونڑ کیتے قرض حسنہ ڈیونڑ سانگے پنج ارب روپے مختص کرنڑ دی تجویز،زرعی قرض ،ایس ایم ای سیکٹردا آمدن تے لایا گیا ٹیکس،چھوٹے گھراں تے بینک قرض آمدنی دا ٹیکس 39فیصدتوں گھٹا تے 20فیصد کرنڑ دی تجویز،سستے موبائل فونزتے ٹیکس گھٹ تھی ویسی ،مہانگے موبائل تے مُل دے مطابق ٹیکس ودھدا ویسی،کساناں کوں یوریا کھاد ڈو سو روپے بوری سستی ملسی،ڈیزل انجن تے ٹیکس 17توں گھٹ کرتے 7فیصد کرنڑ دی تجویز، خام مال دی امپورٹ ڈیوٹی اچ وی کمی کیتی ویسی۔صحت،زراعت، کساناں، تاجر برادری اتے صنعتاں دی ترقی کیتے اصلاحات کریسوں،پرومیسری نوٹ اسکیم نال ایکسپورٹرز کیتے لیکویڈٹی دا مسئلہ مک ویسی، ملک دی ترقی کیتے اوکھے فیصلے وی کرنڑے پئے تاں کریسوں۔ وزیر خزانہ اسد عمر منی بجت پیش کریندے ہوئے آکھیا جے تئیں چھوٹے کاروبار مضبوط نہ ہوسن، معیشت نئیں سنبھل سگدی تہوں بینک دی شرح سود گھٹ کرنڑ اتے صنعتاں دے قرض کیتے ٹیکس ادھا کر تے 20 فیصد ہوسی، زرعی بنکاں دا ٹیکس وی 39 توں گھٹ کرتے 20 فیصد کیتا ویندا پئے،جے آئی ڈی اسکیم تے گالھ کر تے ایوان اچ گھن آسوں، فرٹیلائزرریٹ اچ کمی کیتی ویندی پئی اے جیندے نال کساناں کوں فی بوری یوریا کھاد 200 روپے سستی ملسی،کسان کوں قرض گھنڑ کیتے سوکھ سانگے انڈیکس چار سال توں 4 ہزار یونٹ ہا جیکوں ودھا تے 6 ہزار یونٹ کیتا ویندا پئے، ڈیزل انجن تے 17 فیصد ٹیکس گھٹا تے 7 فیصد کریندے پئے ہیں۔انہاں آکھیا جو گھر بنڑاونڑ دی حوصلہ افزائی کیتے جیہڑا قرض ڈتا ویسی ایندے اچ ٹیکس 39 فیصد توں گھٹا تے 20 فیصد تھیندا پئے جڈاں عوام کیتے 5 ارب دی قرض حسنہ اسکیم وی آندی پئی اے تاں جو لوک گھٹ لاگت تے گھر بنڑا سگن۔اسد عمر آکھیے جو عوام کوں فائلر بنڑن دی ترغیب ڈیونڑ سانگے ود ہولڈنگ ٹیکس ختم کیتا ویندا پئے جیندے نال تاجر برادری دا گلہ مک ویسی،گذشتہ حکومت ولوں شادی ہالاں تے لایا گیا ٹیکس 500 اسکوائر فٹ تئیں دے شادی ہالاں دے ٹیکس کوں 20 ہزارتوں گھٹا تے 5 ہزارکیتا ویندا پئے۔انہاں نیوز پرنٹ دی صنعت کوں درآمد تے عائد ٹیکس توں مکمل استثنیٰ دا اعلان کریندے آکھیا جو آزادی صحافت چینلز کوں، صحافیاں کوں مل گھن تے نئیں ہوندی، خام مال دی امپورٹ ڈیوٹی اچ وی کمی کیتی وینید پئی اے تاں جو اے صنعت ترقی کرے، حکومت درآمد اتے برآمدات دا خسارہ گھٹیسی۔ اسد عمر آکھیا جو ماحولیات اتے سستی بجلی دی پیداوار کیتے شمسی توانائی اتے بئے متبادل ذرائع تے انحصارچاہندے ہیں، ایہو جھیاں مصنوعات کیتے کسٹم، سیلز اتے انکم ٹیکس توں استثنیٰ ہوسی۔انہاںا ٓکھیا جو کھیڈاں دے ودھارے اتے نینگراں کیتے سرکاری طور تے منظور شدہ اسکیم ہوسی اتے فرنچائز کھیڈاں کیتے جولائی توں ٹیکس ختم کر ڈتا ویسی،یکم جولائی توں نان بینکنگ تے سپر ٹیکس مکایا ویندا پئے بھل کارپوریٹ اسکیم تے ہک فیصد دی سالانہ کمی جاری رکھی ویسی۔