وفاقی کابینہ ای سی ایل اچ پاتے گئے 172لوکاں دے ناں نظر ثانی کیتے ای سی ایل جائزہ کمیٹی کوں بھجو اڈتے

اسلام آباد ۔ 2 جنوری (اے پی پی) وزیراعظم عمران خان دے زیر صدارت اسلام ا ٓباد اچ تھیونڑ آلے وفاقی کابینہ دے اجلاس جعلی اکو¿نٹس دے معاملے تے ای سی ایل اچ پاتے گئے 172لوکاں دے ناں نظر ثانی کیتے ای سی ایل جائزہ کمیٹی کوں بھجو اڈتن، کمیٹی اسلام آباد ہائیکورٹ اچ 3ججاں دے ودھارے ، غربت مٹاﺅ اداریاں کوں کٹھا کرتے غربت مکاﺅ کوآرڈینیشن کونسل دے قیام ،گڑدی پیداواراتے ایکسپورٹ تے لائی گئی پابندی چاونڑدی منظوری ڈتی اے،کابینہ تیل اتے گیس دی ڈرلنگ کیتے ہیوی مشینری تے ایڈیشنل کسٹم ڈیوٹی مکاونڑ،کراچی اچ وفاق دے فنڈز نال تعمیر و ترقی دے میگا پراجیکٹس کیتے اعلی اختیاراتی کمیٹی دے قیام ،حویلی بہادر پاور پراجیکٹ سودھے 5یونٹس نجکاری دی ترجیح فہرست اچ پاونڑ،پرویز خٹک دی سربراہی اچ لینڈ بینک دی تشکیل کیتے کمیٹی دے قیام دی وی منظوری ڈتی اے۔اجلاس دےد وران وزیراعظم عمران خان مہانگ دا نوٹس گھندے ہوئے ادارہ شماریات کوں ہدایت کیتی اے جو او 40شہریاں اتے 76مارکیٹاں دی مانیٹرنگ دی رپورٹ کابینہ کوں پیش کرن، لکھاں کنال سرکاری اراضی دے موثر استعمال کیتے پرویز خٹک دی سربراہی اچ قائم کمیٹی آندے ہفتے کابینہ کمیٹی کوں اپنڑی رپورٹ پیش کریسی۔ اے گالھ بدھ کوں وفاقی وزیر اطلاعات و نشریات چوہدری فواد حسین کابینہ اجلاس توں بعد میڈیا کوں بریفنگ اچ ڈسائی اے۔انہاں ڈسایا جو کابینہ جے آئی ٹی دی سفارش تے ناں ای سی ایل اچ پاونڑ اتے ایں سانگے سپریم کورٹ دے نظر ثانی دے احکامات دا جائزہ گھدے۔ناں ای سی ایل اچ پاونڑ کیتے طے شدہ طریقہ کار دے مطابق وفاقی کابینہ عمل کیتے، ایں بارے سفارشات نیب ،ایف آئی اے یا کوئی وی تحقیقاتی ادارہ کابینہ کوں منظوری کیتے بھجویندے،ایندے تے سابق وزیر خزانہ اسحاق ڈار دی مثال موجود اے جیہڑے وزیراعظم دے جہاز تے بیرون ملک گین اتے ول نئیں ولیے تہوں اے معاملہ وزارت داخلہ اچ قائم ای سی ایل جائزہ کمیٹی کوں بھجوا ڈتا گئے، ایں بارے کمیٹی اپنڑیاں سفارشاں ڈیسی جیندے بعد حتمی فیصلہ کیتا ویسی جو ای سی ایل اچ کون کون راہسن۔انہاں آکھیے جو اسلام آباد ہائیکورٹ اچ بئے ترائے جج رلا تے تعداد ست توں ڈاہ کرنڑ دا فیصلہ کیتا گئے جڈاں جو غربت مکاﺅپروگرام دے تحت وفاق دی سطح تے بے نظیر انکم سپورٹ پروگرام ، پاکستان بیت المال ، ذکوة و عشر ، غربت مکاﺅ پروگرام ،اولڈ ایج بینیفٹ آرگنائزیشن (ای او بی آئی) ،ورکرز فنڈز ، نیشنل رورل سپورٹ پروگرام اتے صوبائی سطح تے صوبائی بیت المال ، ذکوة وعشر، سوشل ویلیفئر ڈپیارٹمنٹ،سوشل ویلفیئر اتھارٹی ،چائلڈ پروٹیکشن بیوروسودھے بئے ادارے کٹھے کر تے ہک غربت مکاﺅ کوآرڈینیشن کونسل قائم کرڈتی گئی اے جیندی کنوونیئر ڈاکٹر ثانیہ نشتر ہوسن۔