اسلام آباد ۔ 10 جنوری (اے پی پی) وفاقی وزیرشماریات ،منصوبہ بندی ،ترقی و اصلاحات خسرو بختیار آکھیے جو حکومت دے پہلے 5مہینے اچ افراط زر دی شرح گذریل ترائے حکومتاں دے ایں عرصے دے تناسب نال گھٹ رہی اے،17ہزار روپے ماہانہ تئیں آمدنی آلیاں تے مہانگ ودھنڑ دا اثر نہ پوسی،گھٹ آمدنا ٓلے لوکاں کوں بے نظیر انکم سپورٹ پروگرام دی ماہانہ قسط ودھائی ویسی۔ اے گالھ انہاں اسلام آباد اچ وفاقی وزیر چوہدری فواد حسین دے رلے کابینہ اجلاس دے بعد میڈیا کوں بریفنگ اچ آکھی۔انہاں آکھیا جو پیپلز پارٹی دور حکومت اچ افراط زراچ11.2فیصد ،مسلم لیگ (ن) دور حکومت اچ 9.1فیصد ودھارا تھئے بھل موجودہ حکومت دے پنج مہینے اچ مہانگ دی شرح عشاریہ 4فیصد ودھی اے، اے مالی سال مکنڑ تئیں ایندے اچ بہوں گھٹ ودھارے دا ہدف رکھیا گئے۔ انہاںا ٓکھیے جو وزیراعظم صوبائی حکومتاں کوں مربوط پرائس میکنزم بنڑاونڑ دی ہدایت کیتی اے،مقررہ قیمتاں تے ہی لوکاں کوں شے ملنڑی چاہیدی اے ایندے کیتے عوامی آگاہی مہم چلائی ویسی ۔انہاں ڈسایا جو کابینہ اجلاس اچ افراط زربارے تفصیلی بریفنگ ڈتی گئی اے جو این ویلھے ملک اچ افراط زر سابقہ حکومتاں دے مقابلے اچ کیا ہے۔انہاں آکھیے جو مہانگ دے ودھنڑ دے بارے اپوزیشن دی گال اچ کوئی حقیقت کائنی اتے اے بالکل کوڑ اتے پروپیگنڈا اے۔انہاں آکھیا جڈاں پاکستان تحریک انصاف حکومت سنبھالی تاں افراط زر 5.8ہئی جیہڑی پہلے پنج مہینے بعد دسمبرمکنڑ تئیں 6.2تئین پجی۔
