اسلام آباد ۔ 28 جنوری (اے پی پی) قومی اسمبلی دے اجلاس کوں احسن انداز اچ چلاونڑ سانگے سپیکر اسد قیصر وزیراعظم عمران خان ، قائد حزب اختلاف شہباز شریف اتے سابق صدر آصف علی زرداری سمیت 13 ارکان تے مشتمل پارلیمانی ضابطہ اخلاق کمیٹی دا اعلان کرڈتا ۔ قومی اسمبلی سیکریٹریٹ دے مطابق سپیکر قومی اسمبلی توں منظور تھیونڑ آلی تحریک تے قواعد و ضوابط دے قاعدہ 2007ءدے قاعدہ 244(B)دے تحت حاصل اختیار کوں استعمال اچ گھن آندے ہوئیں کمیٹی بنڑائی اے۔کمیٹی دے ٹرمز آف ریفرنس دے مطابق کمیٹی قواعد و ضوابط دے تحت ارکان قومی اسمبلی دے رویں دا جائزہ گھنسی تے سپیکر قومی اسمبلی تے ایوان ولوں ارکان دے رویں دے حوالے نال بھجوائے گئے کیساں دی چھان بین وی کریسی۔کمیٹی بے بنیاد ثبوتاں دے بغیر میڈیا تے آونڑ آلے کہیں وی معالے یاعدالت اچ زیربحث مقدمیں تے کوئی کاروائی کائناں کریسی ۔کمیٹی ترائے مہینے دی بنیاد تے ارکان اسمبلی دے رویں متعلق رپورٹ ایوان اچ پیش کریسی تے کمیٹی کوں اپنڑے قواعد تے طریقہ کار دا اختیار ہوسی۔کمیٹی دے ارکان اچ قائد ایوان عمران خان ،قائد حزب اختلاف شہبازشریف ، وزیر ریلوے شیخ رشید احمد ، وزیر ہاﺅسنگ و تعمیرات طارق بشیر چیمہ، وزیر انفارمیشن ٹیکنالوجی خالد مقبول صدیقی، ارکان قومی اسمبلی آصف علی زرداری ، اسد محمود ، خالد حسین مگسی، اختر مینگل، غوث بخش مہر ،نوابزادہ شاہ زین بگٹی اتے امیر حیدر خان ہوتی شامل ہن۔
