اسلام آباد ۔ 8 جنوری (اے پی پی)صدرمملکت ’2019ءکوں نرساں دا سال قرارڈے ڈتاآکھیا جو اے پیشہ صحت دے شعبے اچ ریڑھ دی ہڈی دی حیثیت رکھیندے ،نرسنگ دے شعبہ نال جڑی تریمتاں سانگے مناسب تعلیم،تربیت اتے استعدادکار ودھاونڑ دی لوڑھ اے،صحت دا شعبہ حکومتی ترجیحات اچ پہلے نمبر تے ہے،صحت مند اتے تعلیم یافتہ معاشرہ نال بہتر پاکستان دی تعمیر ممکن تھیسی۔انہاں اے گالھ منگل کوں اتھاں نرسنگ اینڈ مڈوائفری سمٹ توں خطاب کریندیں ہوئیں آکھی۔ایں موقع تے وفاقی وزیر صحت عامر محمود کیانی، عالمی ادارہ صحت دے ڈائریکٹر جنرل ڈاکٹر ٹیڈروس ایڈہینم گیری اوسس وی خطاب کیتا۔صدرمملکت ڈاکٹر عارف علوی آکھیا جو نرسنگ اتے میڈوائفری دے پیشے نال جڑے بندیاں دے کردار کوں اجاگر کرنڑ سانگے سال 2019ءکوں نرساں دے سال دے طور منایا ویسی۔انہاں عالمی ادارہ صحت اتے انٹرنیشنل کونسل آف نرسنگ دے تعاون نال عالمی سطح تے چلنڑ آلی نرسنگ ناﺅ مہم دے پاکستان چیپٹر شروع کرنڑ دا اعلان کیتا۔صدرمملکت آکھیا جو نرسنگ دے کردار کوں ودھاونڑ اتے ایں شعبے اچ سرمایہ کاری دا مشن انہاں دے دل دے نیڑے اے۔صدرمملکت ایں موقع تے نرسنگ ڈپلومہ پروگرام کو ںڈگری پروگرام اچ بدلنڑ دا وی اعلان کیتا۔ایں موقع تے وفاقی وزیرصحت آکھیا جو قومی ادارہ صحت دی اراضی تے نرسنگ یونیورسٹی بنڑائی ویسی۔
