اسلام آباد ۔ 29 جنوری (اے پی پی) وزیراعظم عمران خان ’ انسانی حقوق دے تحفظ اتے اقلیتاںتے کمزور طبقات دے حقوق دے فروغ دا عزم کریندیں ہوئیں ہدایت کیتی جو ملک دے سارے حصیاں توں جبری مشقت دے پورے خاتمہ کوں یقینی بنڑاونڑ سانگے اقدامات کیتے ونجن،ادارہ شماریات بالاں توں مشقت بارے ملک اچ سروے کراوے۔اے گالھ انہاں منگل کوں اتھاں جی ایس پی پلس بارے اعلیٰ سطح دا اجلاس دی صدارت کریندیںہوئیں آکھی جئیں اچ وزیر انسانی حقوق شیریں مزاری، وزیر اطلاعات چوہدری فواد حسین، وزیر مملکت داخلہ شہریار خان آفریدی، مشیر تجارت عبدالرزاق داﺅد اتے سینئر حکام شریک تھیے۔وزیراعظم ہدایت کیتی جو کلباں (اسلام آباد کلب، جمخانہ وغیرہ) اتے بئی عوامی جہیں تے گھریلو ملازماں،آیا اتے بئے گھر دے ملازم دی آزادانہ ٹرنڑ پھرنڑ کوں محدود کرنڑ آلے سارے امتیازی سائن بورڈ فوری ہٹا ڈتے ونجن۔انہاں آکھیا جو پاکستان ضابطہ فوجداری اچ ضروری ترامیم کرا تے جبری لاپتہ معاملہ کوں قابل تعزیر آکھیا ویندا پے۔وزیراعظم کوں انسدادتشدد،سزات موت کوں محدود کرنڑ،گھریلو تشدد دے خاتمے اتے انسانی حقوق بارے بئے معاملیاں تے پیشرفت بارے ڈسیا گیا۔وزیراعظم ایں موقع تے آکھیا جو حکومت انسانی حقوق دے تحفظ اتے اقلیتاں اتے معاشرے دے کمزور طبقات دے حقوق دے ودھارے سانگے پرعزم اے۔
