میاں نواز شریف کوں جیل اچ قانون دے مطابق ہر ممکن سہولت ڈتی گئی اے،انہاں دے میڈیکل دی رپورٹس بلکل نارمل ہن ،مریم نواز عوام کوں جذباتی طور بلیک میل نہ کرن،فیاض الحسن چوہان

لاہور۔25 جنوری(اے پی پی )صوبائی وزیر اطلاعات و ثقافت فیاض الحسن چوہان آکھیا جو پنجاب انسٹیٹوٹ آف کارڈیالوجی دی جاری تھی رپورٹ دے مطابق میاں نواز شریف دے ٹیسٹ دی ڈاہ اچوں نو رپورٹس بلکل نارمل ہن صرف ہک اچ مسئلہ اے۔ایں ہک مسئلے بارے میں ہارٹ سرجن توں پتہ کیتے،انہاں دے مطابق میاں نواز شریف دا ہسپتال اچ داخل تھیونڑ بلکل ضروری کائنی جڈانجو انہاں سانگے ضروری اے جو اپنڑی دوائیں ویلھے تے گھنن اتے لونڑ اتے چکنائی آلی چیزاں توں پرہیز کرن۔میڈی دعا اے جو اللہ سئیں ساریاں کوں صحت ڈٰوے۔اے گالھیں صوبائی وزیر اطلاعات و ثقافت فیاض الحسن چوہان ’ پنجاب اسمبلی دے باہر میڈیا نال گالھ مہاڑ کریندیں ہوئیں آکھی ۔انہاں آکھیا جو میاں نواز شریف کوں جیل اچ قانون دے مطابق ہر ممکن سہولت ڈتی گئی اے،انہاں دے میڈیکل دی رپورٹس بلکل نارمل ہن۔مریم نواز عوام کوں جذباتی طور بلیک میل نہ کرن۔