اسلام آباد ۔ 9 جنوری (اے پی پی) وزیرِاعظم عمران خان دے زیر صدارت ٹاسک فورس برائے سپورٹس دا اجلاس تھئے جیندے اچ وزیر برائے بین الصوبائی رابطہ فہمیدہ مرزا، وزیرِ دفاع پرویز خٹک، معاون خصوصی نعیم الحق، معاون خصوصی افتخار درانی، چیئرمین پی سی بی احسان مانی اتے متعلقہ حکام شریک تھین۔ٹاسک فورس وزیرِاعظم کوں پاکستان اچ سپورٹس دے ہر شعبہ دی خراب حالی، وجوہات اتے کھیڈاں دی ترقی کیتے سفارشات ڈتن۔اجلاس اچ فیصلہ کیتا گئے جو کرکٹ، ہاکی، سکواش سودھے بئے کھیڈاں دیاں تنظیماں دی کارکردگی دا جائزہ گھدا ویسی اتے پورے ملک دے سپورٹس بورڈز دی تشکیل نوکیتی ویسی۔ وزیراعظم عمران خان کھیڈاں دے ودھارے دا عزم کریندے آکھیے جو کھیڈاں دے میدان اچ ملکی ٹیلنٹ کوں سامنڑے گھن آونڑ کیتے سیاسی مداخلت، بدانتظامی، سہولتاں دے فقدان اتے بیان وجوہات تے قابو پاونڑ دی لوڑھ اے،نینگراں دا ٹیلنٹ اگو تے گھن آونڑ کیتے ہر سطح تے کم کیتا ویسی۔انہاں آکھیا جو کھیڈاں اچ ناں اچا کرنڑ کیتے نواں تنظیمی ڈھانچہ متعارف کرایاویسی جیندا باقاعدہ اعلان ایں مہینے دی چھیکڑ اچ کیتا ویسی۔
