اسلام آباد ۔ 29 جنوری (اے پی پی) وفاقی وزیر ہوا بازی و نجکاری محمد میاں سومرو آکھیے جو محفوظ،مستعد،پائیدار اتے اقتصادی طور تے موثر شہری ہوابازی کیتے بنڑائیاں ونجنڑ آلیاں عالمی پالیسیاں تے گائیڈ لائینز دی پاکستان حمایت کریندے، ہک مضبوط اتے قابل انحصار فضائی آمدورفت دا نظام (ائیر ٹرانسپورٹ سسٹم)بنڑاونڑ سانگے پاکستان اپنڑے ائیرنیویگیشن انفرااسٹرکچرکوں جدید خطوط تے استوار کرڈتے ،کمیونیکیشن ،نیو یگیشن اتے سرویلینس دا جدید سسٹم نصب کرڈتا گے ،گوادر انٹرنیشنل ائیر پورٹ دی تعمیر نال نہ صرف ملکی ائیر ٹرانسپورٹ سسٹم مستحکم تھیسی بلکہ ایندے نال ملکی اقتصادی ترقی اچ وی تیزی آﺅسی ۔او منگل کوں جنوبی ایشیا دے 8ملکاں دے کوآپریٹو پروگرام شہری ہوابازی( سی او ایس سی اے پی ۔ایس اے )دی اسٹیرئنگ کمیٹی دے ترائے ڈینھاں دے27ویں اجلاس دے افتتاحی سیشن نال خطاب کریندے پئے ہن ۔پاکستان دے شہری ہوابازی شعبے دی اجوکی کارکردگی دے حوالے نال وفاقی وزیر ڈسایا جو ہنڑ ہی شروع کیتا گیا اسلام آباد انٹرنیشنل ائیرپورٹ ملک دا پہلا گرین فیلڈائیر پورٹ اے تے ایندے علاوہ ملک دے بہوں سارے انٹرنیشنل ائیر پورٹس کوں اپ گریڈکر ڈتا گے ۔محمد میاں سومرو آکھیا جو جنوبی ایشیاءاچ شہری ہوا بازی کوں محفوظ بنڑاونڑ کیتے حفاظتی معیارات تے عملدرآمد ہوونڑاں چاہیدے ۔واضح رہے جو سی او ایس سی اے پی ۔ایس اے شہری ہوابازی دی عالمی انجمن دے تحت جاری ہک کوآپریٹوپروگرام ا ے جیں دے ارکان جنوبی ایشیا دے اٹھ ملکاں افغانستان،بنگلہ دیش،بھوٹان،انڈیا،مالدیپ،نیپال، پاکستان اتے سری لنکا ہن۔سی او ایس سی اے پی ۔ایس اے دا بنیادی مقصد شہری ہوابازی دے شعبہ اچ تربیت اتے تیکنیکی امداد دی فراہمی دے ذریعے رکن ملکاں دی مذکورہ شعبے اچ استعدادودھاونڑ اں اے ۔ائیر بس،بوئنگ،ڈائریکٹریٹ جنرل ایوی ایشن فرانس،یورپی ایوی ایشن سیفٹی ایجنسی،فیڈرل ایوی ایشن ایڈمنسٹریشن امریکہ اتے بئے شہری ہوابازی دے عالمی ادارے سی او ایس سی اے پی ۔ایس اے دی معاونت کریندن۔سی او ایس سی اے پی ۔ایس اے دا آغاز 1998ءاچ تھیا ۔ ہنڑ تئیں ایں پروگرام دے چار مرحلے مکمل تھی چکن ۔ہنڑ اے پنجویں مرحلے اچ داخل تھی گے ۔سی او ایس سی اے پی ۔ایس اے کوں ہک سٹیرنگ کمیٹی چلیندی اے ۔سی او ایس سی اے پی۔ایس اے دی اسٹیرنگ کمیٹی دا سال اچ ہک اجلاس تھیندے تے ہنڑ تئیں رکن ملکاں دے مختلف شہراں اچ 26اجلاس تھی چکن ۔ایندا 27واں اجلاس منگل کوں شروع تھی گے جیرھا جو 31جنوری تئیں جاری رہسی ،ایندی میزبانی پاکستان جڈاں جو ایندا انتظام پاکستان سول ایوی ایشن اتھارٹی کریندی پئی اے۔
