اسلام آباد ۔ 31 جنوری (اے پی پی) وزیراعظم عمران خان آکھیے جو پولیو ورکرز دا عزم پاکستان کوں پولیو توں پاک ملک بنڑاونڑ دے مقصد دے حصول کوں یقینی بنڑیسی۔ انہاں اے گال خمیس کوں ہک پولیو ورکر عرفان دی تصویردے رلے اپنڑے ٹویٹ اچ آکھی ۔ عرفان دی اے تصویر سوشل میڈیا تے وائرل اے جیں اچ او ودھ سارے پالے اچ وادی سوات اچ اپنڑی پولیو کٹ چاتے ہوئے کئی فٹ اچی برف اچ رستہ بنڑا تے فرض دی ادائیگی سانگے منزل دے پاسے ٹردا ڈٹھا ونج سگدے ۔ وزیر اعظم عرفان دے رلے اپنڑی ہک تصویر وی شیئر کیتی اے جیں نال انہاں وزیر اعظم آفس اچ گزریل ڈینھ ملاقات کیتی ہئی تے وادی سوات اچ بالاں کوں پولیو دے مرض توں بچاونڑ سانگے ایندے جذبے دی تعریف کیتی ۔وزیر اعظم عمران خان اپنڑے ٹویٹ اچ آکھیے جو عرفان 2 لکھ 60 ہزار ہیروز اچوں ہک اے جیرھا جو بہوں سخت موسمی حالات اچ پولیو دے قطرے پلاونڑ سانگے بالاں تئیں پج ویندے ۔ وزیر اعظم آکھیا اے وائرل وڈیو ہر بندے سانگے احترام اتے فخر دے احساس دی حامل اے۔ وزیر اعظم ” سلام پولیو ورکر“ دے ہیش ٹیگ جیرھے جو سوشل میڈیا تے ٹاپ ٹرینڈ بنڑ گئے ، دے نال اپنڑے ٹویٹ اچ آکھیا جو ایں قسم دے جذبے نال اساں پولیو توں پاک قوم بنڑ ونجنڑ دے قابل ہوسوں۔
