یو اے ای توں سعودی عرب وی پاکستان کوں بیا ہک ارب ڈالر ڈے ڈتے، زرمبادلہ دے ذخائر پنج مہینے دی اچی سطح تے پج گین، سٹیٹ بینک آف پاکستان

اسلام آباد ۔ 25 جنوری (اے پی پی)سٹیٹ بنک آف پاکستان آکھیے جو متحدہ عرب امارات دے بعد سعودی عرب ولوں وی ہک ارب ڈالر دا بقیہ پیکج ملنڑ توں بعد ملکی زر مبادلہ دے ذخائر پچھلے پنج مہینے اچ اُتلی سطح تے پج گین۔سعودی عرب چار مہینے پہلے پاکستان کوں 3ارب ڈالر دا مالیاتی پیکیج ڈیونڑ دا اعلان کیتا ہا۔ اے ڈو ڈینہہ اچ پاکستان کوں ملنڑ آلی مسلسل ڈوجھی قسط اے۔ پہلے خمیس کوں وی متحدہ عرب امارات ولوں ہک ارب ڈالرملیے ہن۔ترجمان سٹیٹ بینک آف پاکستان دے مطابق دوست ملکاں توں ڈو ارب ڈالرملنڑ نال ملک دے زرمبادلہ دے ذخائر مستحکم تھین۔سٹیٹ بینک آف پاکستان دے زرمبادلہ دے ذخائر بارے حتمی اعدادو شمار آندے ہفتے نوٹیفکیشن اچ ڈیسی۔ایں توں پہلے سٹیٹ بینک آف پاکستان دے تازہ ترین اعدادو شماردے مطابق ملک اچ غیر ملکی زرمبادلہ دے مجموعی ذخائر 18جنوری 2019ءکوں 13.257ارب ڈالر ہن جیندے اچ سٹیٹ بینک آف پاکستان دے غیر ملکی زرمبادلہ دے ذخائر 6.636 ارب ڈالرہن۔ کمرشل بینکاں کولوں غیر ملکی زرمبادلہ دے ذخائر دا مجموعی حجم 6.621 ارب ڈالرہا۔ سعودی عرب اتے متحدہ عرب امارات توں ڈو ارب ڈالرآونڑ نال سٹیٹ بینک آف پاکستان کولوں غییر ملکی زرمبادلہ دے ذخائر 8ارب ڈالرتوں ودھ گین۔