قومی سلامتی کمیٹی دا اجلاس؛وزیراعظم مسلح افواج کوں بھارتی جارحیت دا فیصلہ کن اتے زوردار جواب دیونڑ دا اختیار ڈے ڈتے

اسلام آباد ۔ 21 فروری (اے پی پی) وزیراعظم عمران خان مسلح افواج کوںکہیں وی قسم دی بھارتی جارحیت دا فیصلہ کن اتے زوردار جواب دیونڑ دا اختیار ڈیندے ہوئے آکھیے جو اے نواں پاکستان اے،اساں اپنڑے عوام کوں یاد ڈویندے ہیں جو ریاست انہاں دا تحفظ کرسگدی اے، یقین اے جو طاقت دے استعمال دا اختیار صرف ریاست کوں اے، دہشت گردی اتے انتہاءپسندی خطے اچ بنیادی مسائل ہین جیندے نال پاکستان سودھا پورا خطہ متاثرتھئے، پاکستان 70 ہزارجاناں دی قربانی ڈتی اے اتے بہوں وڈا مالی نقصان چاتے۔اے گالھ انہاں اسلام آباد اچ تھیونڑ آلے قومی سلامتی کمیٹی دے اجلاس نال خطاب کریندے آکھی۔ اجلاس اچ پلوامہ واقعہ دے بعد جیو اسٹریٹجک اتے قومی سلامتی صورتحال تے غورکیتا گئے۔اجلاس اچ واضح کیتا گئے جو پاکستان دی ریاست مذکورہ واقعہ اچ بالکل ملوث کائنی،واقعہ دی منصوبہ بندی اتے عمل درآمد مقامی سطح تے کیتا گئے،ایں سانگے پاکستان تحقیقات دی پرخلوص پیشکش کریندے ہوئیں دہشت گردی سودھے بئے متنازعہ امور تے الوانڑ دی وی پیشکش کیتی اے، امید اے جو بھارت ایندا ممثبت جواب ڈیسی، بھارت کوں سمجھنڑا ہوسی جو مقبوضہ کشمیر دے لوک مرنڑ توں کیوںبے خوف تھی گین؟اے مقبوضہ کشمیر اچ بھارتی افواج دے تشدد دا انتہائی منفی ردعمل ، عالمی برادری کوں اقوام متحدہ دیاں قرارداداں اتے کشمیری عوام دیاں خواہشاں دے مطابق دیرینہ تنازعہ کشمیردے حل اچ اپنڑا کردار ادا کرنڑاں ہوسی۔اجلاس اچ آکھیا گئے جو پاکستان دہشتگردی دے خلاف 2014ءاچ اتفاق رائے نال قومی لائحہ عمل جاری کیتے،پاکستان دی ریاست خطرے کوں سمجھدے ہوئے یقینی بنڑیسی جو شدت پسندی اتے انتہاءپسندی دیاں پاڑاں پٹیان ونجن،ریاست کڈاھیں وی انتہاءپسنداں دے ہتھوں یرغمال نہ بنڑسی۔وزیراؑظم ہدایت کیتی جو ایں سانگے وزارت داخلہ اتے سیکورٹی ادارے فوری طورتے عملی اقدامات تیز کرن۔