بھارت حملے دا سوچیا وی تاں پاکستان ایندا چنگاں جواب ڈیسی،وزیر اعظم عمران خان دا نشریاتی خطاب

اسلام آباد ۔ 19 فروری (اے پی پی) وزیراعظم عمران خان دی بھارت کوں پلوامہ حملے دی تحقیقات اچ تعاون دی پیشکش کیتی اے ۔انہاں آکھیا بھارت حملے دا سوچیا تاں پاکستان ایندا منہ بھن ڈیسی۔ جنگ شروع کیتی گی تاں گال بئے پاسے ٹر پوسی،ا ے اﷲ جانڑدے ، بھارت ڈے پاکستان دے ملوث ہوونڑ دے کوئی ثبوت ہن تاں اساکوں ڈیوے اساں کاروائی کریسوں ،نویں پاکستان اچ نویں سوچ اے۔ اے گال اساڈے اپنڑے مفاد اچ اے جو نہ تاں اساڈی سرزمین توں باہر ونج تے کوئی دہشت گردی کرے اتے نہ ہی پاکستان آ تے کوئی دہشت گردی کرے، افغانستان آلی کار کشمیر دا مسئلہ وی گال بات نال حل تھیسی، بھارت سوچے جوکشمیری نینگراں کوں موت دا ڈر کیوں کائنی ۔ پلوامہ واقعہ دے حوالے نال منگل کوں قوم دے نال نشریاتی خطاب اچ وزیراعظم عمران خان آکھیے جومقبوضہ کشمیر دے علاقہ پلوامہ اچ کجھ ڈینھ پہلے ہک واقعہ تھیا، ایندا الزام پاکستان تے لاڈتا گئے۔ انہاں آکھیے جو میں اوں ٹائم ایں بارے ردعمل دا اظہار کرنڑ چاہندا ہم ،جڈاںپاکستان پر الزام لاتا گیا ہا لیکن سعودی ولی عہد دے دورہ پاکستان دی وجہ نال میں فیصلہ کیتا جو حالی جواب نہ ڈتا ونجے ،تاں جو سعودی ولی عہد دے دورے توں توجہ نہ ہٹ ونجے۔ انہاں آکھیے جو جڈاں ولی عہد واپس گئے تا ں میں بھارتی حکومت کو ںجواب ڈیونڑ چاہنداں۔ وزیراعظم آکھیے جو پاکستان تے بغیر ثبوت دے الزام لا ڈتا گے۔ پاکستان کوں ایجھا واقعے اچ ملوث ہوونڑ داکوئی فائدہ کائنی ، سعودی ولی عہد دے دورے دے موقع تے کوئی بیوقوف ہوسی جیرھا دورے کوں سبوتاژ کرنڑ سانگے ایجھا واقعہ کریسی۔ انہاں آکھیے جو پاکستان ہک ایجھا مرحلے اچ اے جڈاں اواستحکام آلے پاسے ویندا پئے، اساں15 سال دہشت گردی دے خلاف جنگ کیتی ،جیندے اچ 70 ہزار پاکستانی شہید تھئے، ہنڑ امن اتے استحکام آ ندا پئے ۔ایں ٹائم اساکوں ایجھے واقعات نال کیا فائدہ تھیسی۔ انہاں آکھیے جومیں بھارتی حکومت توں پچھنڑ چاہنداں جو کیا تساں ماضی دے اندر پھسے رہنڑ اتے ہر دفعہ تھیونڑ آلا کوئی وی سانحہ ہووےے تاں تساں ایندا ذمے وار پاکستان کوں آکھنڑاں اے۔انہاں آکھیے جو ایندے بجائے مسئلہ کشمیر دے حل آلے پاسے پیشرفت کیتی ونجے۔ انہاں آکھیے جو میں واضح طور تے آکھنڑ چاہندا جو اے نواں پاکستان اے، نویں سوچ اے، اساڈے فائدے اچ اے جو نہ اساڈی سر زمین توںباہر ونج تے کوئی دہشت گردی کرے اتے نہ پاکستان آ تے کوئی دہشت گردی کرے۔ انہاں آکھیا جو میں اج بھارت کوں پیشکش کر ینداں جو او پلوامہ حملے دی کہیں قسم دی تحقیقات کراونڑ چاہندے تاں کرا گھنے، اتے اگر انہاں ڈے کہیں پاکستانی دے ملوث ہوونڑ دے کوئی ثبوت ہن تاں اساکوں ڈتے ونجن۔انہاں آکھیے جو میں ضمانت ڈینداں جو اساں کارروائی کریسوں کیونجو اگر کوئی پاکستان دی سرزمین استعمال کر یندا پئے تاں اے اساڈے مفاد دے خلاف اتے پاکستان نال دشمنی اے۔ انہاں آکھیے جو جڈاں اساں بھارت نال مذاکرات دی گال کریندوں تاں ا و دہشت گردی تے گال کرنڑ دی شرط رکھ ڈیندے، دہشت گردی پورے خطے دا ایشو اے اتے اساں چاہندوں جو دہشت گردی منڈھوں مک ونجے کیونجو دہشت گردی نال ساریں توں ودھ پاکستان متاثر تھئے، 70 ہزار پاکستانی شہید تھئے اتے معیشت کوں 100 ارب ڈالر توں ودھ ضیان تھئے ۔ انہاں آکھیے جو میں ایں موقع تے ڈو گالھیں آکھنڑ چاہنداں ، ہندوستان اچ ہک نویں سوچ آونڑیں چاہیدی ہے اتے انہاں کوں غور تے فکر کرنڑیں چاہیدے جو کیاوجہ ہے جو کشمیر دے نینگراں اچ موت دا ڈر مک گئے ، کوئی تاں وجہ ہوسی۔ انہاں آکھیے جو کیا بھارت سمجھدے جو فوج دے ذریعے اے مسئلہ حل تھیسی، فوج دے ذریعے کہیں مسئلے دا حل اج تئیں کامیاب نی تھیا اتے اگی تے کیویںکامیاب تھیسی، اگر اج افغانستان اچ17 سال بعد پوری دنیا من گھدے جو ایں مسئلہ دا فوجی حل کائنی اتے ا ےے معاملہ گال مہاڑ نال ہی حل تھیسی تاں بھارت اچ وی ایں ایندے تے بحث تھیونڑ یں چاہیدی اے۔ انہاں آکھیے جواساںبھارت توں آونڑ آلیاں آوازاں سنڑدے پیوں ، میڈیا اتے سیاستداناں دیاں آوازاں آندیاں پن جو پاکستان کوں سبق سکھاونڑ چاہندوں اتے بدلہ گھننڑ چاہندوں۔ وزیراعظم آکھیے جو پہلی گال تاں ا ے ہے جو دنیا داایجھا کیرھا قنون کہیں وی ہک بندے یا ملک کوں جج، جیوری یا ایکسیکیوشن بنڑنڑ دی اجازت ڈیندے، اے کیرھے انصاف دے نظام اچ اے ۔ ڈوجھی گال اے ہے جو بھارت اچ اے الیکشن دا سال اے اتے پاکستان کوں سبق سکھاونڑ دے نعرے الیکشن سانگے ہن۔ وزیراعظم واضح کیتے جو بھارت پاکستان تے کہیں قسم دا کوئی حملہ کریسی تاں پاکستان منہ بھن جواب ڈیونڑ کیتے سوچسی کائناں بلکہ پاکستان جواب ڈیسی اتے اساکوں جواب ڈیونڑ دے علاوہ کوئی بیا رستہ کائناں ہوسی ۔ انہاں آکھیے جو اساں سارے جانڑدوں جو جنگ شروع کرنڑ سوکھی اے ، جنگ شروع کرنڑانسان دے ہتھ اچ ہوندے لیکن جنگ ختم کرنڑ انسان دے ہتھ اچ کائنی، جنگ دی صورت اچ اے گال کتھاں ویسی اے، اﷲ ہی بہتر جانڑدے، ایں سانگے میں امید کرینداں جو اساں عقل اتے حکمت دا استعمال کریسوں اتے کشمیر دا مسئلہ وی افغانستان وانگوں گال مہاڑ نال ہی حل تھیسی ۔