وزیر خارجہ شاہ محمود قریشی دا برطانوی پارلیمنٹ اچ آل پارٹیز پارلیمانی گروپ دے اہتمام نال انٹرنیشنل کشمیر کانفرنس توں خطاب

لندن ۔ 5 فروری (اے پی پی) وزیر خارجہ شاہ محمود قریشی آکھیے جو پاکستان جموں تے کشمیر جھیڑے دا ہک فریق اے ،انسانی حقوق دی بھارتی خلاف ورزیاں دی تحقیقات کیتے وختی کمیشن بنڑایا ونجے ، مقبوضہ کشمیر اچ انسانیت دا خون وہندا پئے ،وادی سڑدی پئی اے ،لوک ڈردن ،بھارت کیوں ہک پوری کشمیری نسل کوں قتل کریندا پئے ، اقوام متحدہ وی انسانی حقوق دیاں خلاف ورزیاں تے پہلی واری رپورٹ جاری کیتی اے ، یواین رپورٹ اچ کمیشن آف انکوائری قائم کرنڑ دا مطالبہ کیتا گے، مسئلہ کشمیر اقوام متحدہ دے ایجنڈے تے ساریں توں پرانڑاں اے ، بھارت مقبوضہ کشمیر اچ استصواب رائے دا وعدہ کیتے ولا مکر گئے ، بھارت ایل او سی دے ڈوہیں پاسے عام شہریاں کوں نشانہ بنڑیندا پئے ۔او گزریل ڈینھ آل پارٹیز پارلیمانی گروپ دے اہتمام نال انٹر نیشنل کشمیر کانفرنس توں خطاب کریندے پئے ہن ۔انہاں آکھیا جو بھارتی ظلم دے خلاف بھارت اچ وی آواز اٹھدی پئی اے ،لکھاں کشمیریاں دا خون ضائع کائناں ویسی ۔ سینیٹ سٹینڈنگ کمیٹی امور خارجہ دے ممبران سینیٹر مشاہد حسین سیّد دی قیادت اچ پاکستانی وفد اتے برطانوی ممبران پارلیمینٹ دی ودھ ساری تعداد کانفرنس اچ شرکت کیتی ۔ وزیر خارجہ مخدوم شاہ محمود قریشی آکھیا جو مقبوضہ جموں و کشمیر انٹرنیشنل کانفرنس اچ شرکاءدی ودھ ساری موجودگی بہوں حوصلہ افزا اے ، میں ممبر پارلیمنٹ، چیئرمین آل پارٹیز پارلیمانی گروپ دا خصوصی طور تے شکر گزا ر ہاں انہاں بہوں اہم موضوع تے بین الاقوامی کانفرنس کرائی اے ۔