اسلام آباد ۔ 13 فروری (اے پی پی) ربیع دی فصلاں کوں پانڑیں لاونڑ کیتے ملک اچ آندے مینھ بارے جانڑن ضروری ہے۔ محکمہ موسمیات اتے زرعی شعبہ دے ماہرین کاشتکاراں کو ں ہدایت کیتی جو آندے 10 ڈینھاں دوران سندھ دے علاوہ پورے ملک اچ مینھ وسنڑ دا امکان ہے اتے تقریباً 30ملی میٹر مینھ دی توقع ہے۔ انہاں آکھیے جو ربیع دی کھڑی فصلاں کوں پانڑیں لاونڑ توں پہلے مینھ دی صورتحال دے پیش نظر منصوبہ بندی دی ضرورت ہے تاں جو فصل اچ پانڑیں کھڑا تھیونڑ دی وجہ نال تھیونڑ آلا نقصان توں بچیا ونج جا سگے۔ زرعی ماہرین آکھیے جواگر کہیں فصل کوں ضرورت توں ودھ پانڑیں لاتا ونجے تاں ایندی پیداوار متاثر تھیندی ہے۔ انہاں آکھیے جو آبپاشی دا شیڈول بنڑا تے مینھ بارے جانڑن ضروری ہے۔ محکمہ موسمیات اتے ماحولیات دے شعبہ دے ماہرین آکھیے جوحالیہ مینھ تے برفباری نال ملک اچ پانڑیں دی دستیابی اچ ودھارا تھئے۔ انہاں آکھیے جوحالیہ برفباری گزریل 70 سال دوران تھیونڑ آلی سبھ توں ودھ برفباری ہے جڈاں جو مینھ وسنڑ اچ وی 30 فیصد ودھارا تھئے اتے جاری سیزن اچ تھیونڑ آلی برفباری گزریل سال دے مقابلے اچ 50 فیصدودھ ہے۔ انہاں آکھیے جو مینھ اتے بارانی علاقیاں دی فصلاں تے چنگے اتے خوشگوار اثرات تھئے۔ جڈاں جو بارانی علاقیاں اچ پیداوار اچ ودھارا متوقع ہے جیندی مدد نال معیشت دی ترقی اچ مدد ملسی۔
