اوکھا ویلھا ضرور اے پَر ملک دا مستقبل روشن اے،ریل عام آدمی دے سفر دا سستہ ذریعہ اے،اوندی ترقی اساڈی ترجیح اے،وزیراعظم عمران خان دا پاکستان ریلوے لائیو ٹریکنگ سسٹم اتے تھل ایکسپریس دے افتتاح دی تقریب توں خطاب

اسلام آباد ۔ 12 فروری (اے پی پی) وزیراعظم عمران خان آکھیا جو نویں پاکستان دا مقصد عام بندے دی زندگی سوکھی کرنڑ اے،اوکھا ویلھا ضرور اے پَر ملک دا مستقبل روشن اے،ریل عام آدمی دے سفر دا سستہ ذریعہ اے،اوندی ترقی اساڈی ترجیح اے،ریل دے نظام کوں غیر ملکی سانجھے داری نال اگوں ودھیسوں،چوری اتے کرپشن پاروں ملک دے قرضے اچ ڈاہ سالیں اچ چھی ہزار ارب روپے توں ودھ کراہیں 30ہزار ارب تئیں پج گئے،این آر اوز لوکاں اچ احتساب دا ڈر مُکا ڈتا ہئی ،ریلویز اچ چوری تے بے ایمانی دے سارے کیسز نیب کوں بھجویسوں۔او منگل کوں پاکستان ریلوے لائیو ٹریکنگ سسٹم اتے تھل ایکسپریس دے افتتاح دی تقریب توں خطاب کریندے پے ہن ۔وزیراعظم آکھیا جو اساں اے ڈیکھنڑاں اے جو ماضی اچ ترجیحات کیا ہن اتے عام بندے دے سفر دی سوکھ سانگے ریلوے تے کتنی توجہ ڈتی گئی اے،اتھاں امیراں سانگے سہولتاں ڈتیا گئن جڈانجو اساں نویں اکستان دی گالھ کریندوں تاں اساڈی سوچ بدل ویندی اے جو عام لوکاں کوں فائدہ کینویں ڈتا ونجے اتے کینویں انہاں کوں اوکھ توں کڈھیا ونجے۔انہاں آکھیا جو اساں ٹرانسپورٹ دے نظام کوں بئی ترقی ڈیسوں،ساکوں اجاں چھی مہینے تھین ،اساڈی کوشش ہوسی جو ٹرین دے نظام کوں اگلے درجے تے گھن تے ونجوں ،ایں بارے باہرلے سرمایہ کاراں نال رل تے کم کیتا ویسی۔انہاں آکھیا جو چین توں ریلوے دے نظام ایم ایل ون دی ترقی اچ مدد گھدی ویسی جئیں نال ٹرانسپورٹ دا نظام بہتر تھی ویسی۔کراچی توں پشاور تئیں دا سفر اٹھ گھنٹے اچ تھیسی اتے عام لوکاں سانگے سوکھ تھیسی۔عمران خان آکھیا جو وفاقی وزیر ریلوے شیخ رشید ریلوے اچ چوری تے کرپشن دے کیسز دی نشاندہی کیتی گئی ،انہاں کوں اے کیسز نیب گھن ونجنڑے چاہیدن تانجو آندے لوک چوری اتے بے ایمانی نہ کر سگن۔وزیراعظم آکھیا جو چوری اتے کرپشن پاروں ملک دے قرضے اچ ڈاہ سالیں اچ چھی ہزار ارب روپے توں ودھ کراہیں 30ہزار ارب تئیں پج گئے۔انہاں قرضیاں تے اساں روز چھی ارب روپے سود دی مد اچ ڈیندے پیوں۔وزیراعظم وفاقی وزیرریلوے شیخ رشید احمد دی ریلوے دی رتقی سانگے کوششاں دی تعریف کریندیں ہوئیں آکھا جو ایں شعبے اچ بئے خرچے گھٹ کرنڑ دی لوڑھ اے۔وزیراعظم ہاﺅس دا خرچہ 30فیصد گھٹ کر ڈتا گئے ۔ وفاقی وزیر برائے ریلوے شیخ رشید احمد ’ ریلوے دے شعبہ دی کارکردگی اتے ٹریکنگ سسٹم دی اہمیت تے مقاصد توں علاوہ تھل ایکسپریس بارے وزیراعظم کوں بریفنگ ڈتی۔ایں موقع تے وفاقی وزیر،ارکان پارلیمنٹ اتے بئی اہم شخصیات موجود ہن ۔