اوکھے ویلھے اچوں نکل آئے ہیں،سعودی ولی عہد دے دورہ نال ملک اچ وڈی سرمایہ کاری آسی، وزیر اعظم

پشاور۔ 15 فروری (اے پی پی) وزیراعظم عمران خان آکھیے جو اوکھے ویلھے اچوں نکل آئے ہیں،سعودی ولی عہد دے دورہ نال ملک اچ وڈی سرمایہ کاری آسی،قبائلی اضلاع اچ غربت مکاونڑ اتے ترقی ڈیونڑ ترجیح اے، صحت انصاف کارڈز غریباں کیتے وڈی نعمت ثابت تھیسی،غربت مکاونڑ کیتے ہک وڈے اتے جامع پروگرام دا اعلان ایں مہینے کیتا ویسی۔اے گالھ وزیراعظم عمران خان خیبر پختونخوا اچ ضم کیتے گئے قبائلی اضلاع کیتے پشاور اچ تھیونڑ آلی صحت انصاف کارڈز دے اجراءدی تقریب نال خطاب اچ آکھی۔ انہاں آکھیا جو او قبائلی علاقیاں دے لوکاں نال کیتا گیا وعدہ پورا کرنڑ تے خوش ہین،اساں فیصلہ کیتا ہا جو غریب اتے محکوم نچلے طبقے کیتے جو وی چنگاں کریسوں اوندی شروعات قبائلی علاقہ توں کریسوں،ہیلتھ کارڈ عام لوکاں دا جیونڑ بدلنڑ دا ہی پروگرام اے جیہڑا غریب گھرانے کیتے ہک نعمت ہوسی اتے اوکھے ویلھے کم آسی۔انہاں آکھیے جو قبائلی علاقیاں دی حالت بدلنڑ کیتے جامع منصوبہ بندی کیتی ویندی پئی اے،ایندے اچ دیر ملک تے تھپیے گئے قرض دی وجہ توں تھئی اے بھل ہنڑ اساں وڈی حد تئیں اوکھے معاشی حالات توں نکل آئے ہیں۔ انہاںا ٓکھیا جو سعودی ولی عہد دا دورہ پاکستان کیتے بہوں اہم اے، ایں سانگے بہوں وڈی سرمایہ کاری متوقع اے اتے قرض ولا ڈے سگسوں۔انہاں آکھیے جو تیکھے تخفیف غربت پروگرام شروع تھیندا پئے جیندے اچ جاری کیتے گئے سارے فنڈز قبائلی علاقیاں تے خرچ تھیسن جیندے نال اتھاں سکول ،کالج اتے ہسپتال بنڑائے ویسن۔ایں توں پہلے وزیراعظم قبائلی اضلاع دے مستحق لوکاں کوں صحت انصاف کارڈزونڈین۔