بیوروکریسی کوں مکمل طور تے غیر سیاسی اتے عوامی خدمت دا حامل بنڑاونڑ پی ٹی آئی حکومت دا منشور اے ،وزیراعظم

اسلام آباد ۔ 22 فروری (اے پی پی) وزیراعظم عمران خان آکھیے جو بیورو کریسی کوں مکمل طور تے غیر سیاسی تے عوامی خدمت دا حامل بنڑاونڑ پی ٹی آئی حکومت دا منشور اے ، سرکاری اہلکاراں ولوں عوام کیتے مشکلات پیدا کرنڑدی روش کہیں صورت وی قبول کائنی ۔ عوامی نمائندے بدعنوانی، رشوت خوری اتے اقرباءپروری اچ ملوث عناصر دی نشاندہی کرن، سرکاری میٹنگز دی آڑ اچ عوام کوں کئی گھنٹے انتظار کراونڑ دی روش کہیں صورت برداشت کائناں کیتی ویسی ، سرکاری افسراں تے عوام کیتے اوپن ڈور پالیسی تے من وعن عمل کوں یقینی بنڑاون۔ انہاں اے گال سرگودھا ڈویژن نال تعلق رکھنڑ آلے ارکان قومی اسمبلی نال گال مہاڑ کریندے ہوئیں آکھی جنہاں جمعے کوں انہاں نال ملاقات کیتی ۔ ملاقات اچ ملک عمر اسلم خان، ملک محمد احسان اﷲ ٹوانہ، امجد علی خان، ثنا اﷲ مستی خیل، ڈاکٹر محمد افضل خان ڈھانڈلہ، چوہدری عامر سلطان چیمہ اتے جویریہ ظفر آہیر موجود ہن۔ وزیراعظم دے معاون خصوصی نعیم الحق، ارشد داد تے ترجمان ندیم افضل گوندل وی ملاقات اچ شریک ہن ۔ وزیراعظم چوہدری عامر سلطان چیمہ کوں رکن قومی اسمبلی منتخب تھیونڑ آلے مبارخ ڈتی۔ ارکان قومی اسمبلی عوام کوں درپیش مسلیں بارے وزیراعظم کوں ڈسایا ۔ منتخب نمائندیں وزیراعظم کوں انتظامیہ اتے پولیس متعلقہ مسلیں بارے ڈسایا۔ ایں موقع تے گال مہاڑ کریندے ہوئیں وزیراعظم آکھیا جوبیوروکریسی کوں مکمل طور تے غیر سیاسی بنڑاونڑ تے پبلک سروس ڈیلیوری کوں یقینی بنڑاونڑ پاکستان تحریک انصاف دی حکومت دا منشور اے ۔ انہاں آکھیا جو سرکاری اہلکاراں ولوں عوام کیتے مشکلات پیدا کرنڑدی روش کہیں صوت قابل قبول کائنی ۔ عوامی نمائندے بدعنوانی ، رشوت خوری اتے اقربا پروری اچ ملوث عناصردی نشاندہی کرن۔ انہاں آکھیا جو منتخب نمائندے عوام کوں پیش آندے مسلیں دی نشاندہی تے انہاں دے حل کوں یقینی بنڑاونڑ کیتے متحرک کردار ادا کرن ۔ وزیراعظم آکھیا جو ملک اچ غریب اتے مستحق لوکاں دی مدد تے معاونت کیتے مفصل پروگرام دا اعلان وختی کیتا ویسی۔ انہاں آکھیا نینگراں کوں ہنر سکھاونڑ تے زراعت دی ترقی حکومت دی ترجیح اے ۔ منتخب نمائندیں مظفر گڑھ ۔ میانوالی شاہراہ اتے سرگودھا ۔ میانوالی سڑک دا انتظام این ایچ اے دے حوالے کرنڑ دا مطالبہ وی کیتا۔ ملاقات اچ سرگودھا ڈویژن اچ پارٹی دے تنظیمی معاملات وی زیر غور آئے۔