اسلام آباد ۔ 18 فروری (اے پی پی) تجارت بارے وزیراعظم دے مشیر عبدالرزاق داﺅد آکھیے جو پاکستان دی شرح نمو اتے معیشت دی ترقی سانگے سعودی عرب دی سرمایہ کاری وڈی اہمیت رکھیندی ہے۔ سنوار کوں اسلام آباد دے مقامی ہوٹل اچ پاک سعودی عرب بزنس کانفرنس نال خطاب کریندے ہوئیں انہاں آکھیے جو سعودی عرب خوشحالی دے سفر اچ پاکستان داپارٹنر ہے۔انہاں آکھیے جوسعودی سرمایہ کاراں ولوں کان کنی اتے معدنیات دے شعبیں اچ سرمایہ کاری وڈی اہم ہے۔ سعودی عرب دے نال اساڈے تعلقات مختلف سمت اچ اتے مختلف سطح تے اگی تے ودھدے پن، پاکستان دے مختلف شعبیں اچ سعودی عرب ولوں وڈے پیمانے تے سرمایہ کاری دے اعلان نال اساڈی معیشت اچ بہتری آوسی۔ انہاں آکھیے جو سعودی سرمایہ کاراں اتے تاجراں کوں انہاں دے کاروباری منصوبیں اچ ہر طرح دی ممکنہ سہولتاں ڈتیاں ویسن۔ سعودی ولی عہد شہزادہ محمد بن سلمان دے حالیہ دورہ پاکستان دے موقع تے پہلے مرحلہ اچ آئل ریفائننگ، پیٹروکیمیکل سمیت بئے مختلف شعبیں اچ 20 ارب ڈالر توں ودھ دی سرمایہ کاری سانگے معاہدیں تے مفاہمت دی یادداشتاں تے ڈوہائیں ملکاں دستخط کیتن،جیندی مدد نال پاکستان اچ سرمایہ کاری دے حوالے نال بین الاقوامی سرمایہ کاراں دے اعتماد اچ ودھارا تھیسی اتے پاکستان اچ کیتی ونجنڑ آلی براہ راست غیر ملکی سرمایہ کاری کوں فروغ ملسی۔ سعودی عرب دے تجارت دے وزیر ماجد الکسابی ایں موقع تے آکھیا جو پاکستان اتے سعودی عرب دے تعلقات ہک نویں اتے مثبت پاسے اگی تے ودھدے پن۔ ڈوہائیں ملکاں دے اقتصادی تعاون اچ فروغ نال معاشی ترقی دے اہداف حاصل کرنڑ اچ مدد ملسی۔ پاک سعودی عرب بزنس کانفرنس نال سرمایہ کاری بورڈ دے چیئرمین/ وزیر مملکت ہارون شریف وی خطاب کیتا اتے سعودی عرب دے تجارتی وفد کوں پاکستان اچ خوش آمدید آکھنڑ دے نال نال ملکی معیشت دے مختلف شعبیں اچ سرمایہ کاری دے دستیاب مواقع بارے ڈسایا۔ کانفرنس اچ شریک سعودی سرمایہ کاراں توانائی، زراعت، سیاحت سمیت قومی معیشت دے مختلف شعبیں اچ سرمایہ کاری اچ دلچسپی دا اظہار کیتے۔
