اسلام آباد ۔ 18 فروری (اے پی پی) سعودی ولی عہد پاکستان دا 2 ڈینھ دا تاریخی دورہ مکمل کرنڑدے بعد سنوارکوں وفاقی دارالحکومت توں روانہ تھے تاں انہاں کوں فقید المثال استقبال وانگوں شایان شان انداز اچ الوداع وی کیتا گے ۔ وزیراعظم عمران خان سعودی ولی عہد دے رلے ایوان صدر توں نورخان ایئربیس تئیں کود گاڈی چلائی ۔ ایں موقع تے نور خان ایئربیس تے وزیراعظم عمران خان اتے سعودی ولی عہد میڈیا نال گال مہاڑ وی کیتی ۔ بعد اچ وزیراعظم وزیر خارجہ شاہ محمود قریشی، وزیر اطلاعات و نشریات چوہدری فواد حسین، وزیر مہمانداری خسرو بختیار، چیف آف آرمی سٹاف جنرل قمر جاوید باجوہ اتے بئے اعلیٰ حکام دے رلے شہزادہ محمد بن سلمان کوں بہوں پرجوش اتے والہانہ انداز اچ الوداع کیتا ۔ سعودی ولی عہد دا طیارہ جیویں ہی ہوا اچ اڈیا تاں وزیراعظم اتے ہوائی اڈے تے موجود بئی اعلیٰ شخصیات ہتھ ہلاتے انہاں کوں الوداع آکھیا ۔ اتھاں اے امر قابل ذکراے جو سعودی ولی عہد دے دورے دے موقع تے پاک۔سعودی سپریم کوآرڈینیشن کونسل دا اجلاس منعقد تھیا جیں دی سانجھی صدارت وزیراعظم اتے سعودی ولی عہد کیتی۔ ایں موقع تے ڈوہیں ملکاں وچال مختلف شعبیں اچ تعاون دے ست معاہدیں اتے یادداشتاں تے دستخط وی تھن۔ وزیراعظم سعودی ولی عہد نال ون آن ون ملاقات کیتی تے انہاں دے اعزاز اچ عشائیہ وی ڈتا۔ بعد اچ ایوان صدر اچ سعودی ولی عہد کوں پاکستان دا اعلیٰ ترین سول اعزاز ”نشان پاکستان“وی ڈتا گیا ۔ صدر ڈاکٹر عارف علوی ایوان صدر اچ انہاں دے اعزاز اچ پروقار ضیافت دا اہتمام وی کیتا۔
