صدر ٹرمپ دے بیان دا خیرمقدم کریندوں،امریکا دی مداخلت خاطے اچ امن کیتے مددگار ثابت تھی سگدی اے ،سعودی وزیر خارجہ ولی عہد دا اہم پیغام گھن تے پاکستان آندے پن ، وزیر خارجہ شاہ محمود قریشی

اسلام آباد ۔ 28 فروری (اے پی پی) وزیر خارجہ شاہ محمود قریشی امریکی صدرڈونلڈ ٹرمپ دے بیان دا خیر مقدم کریندے ہوئیں آکھیے جو پاکستان دے امریکہ نال پرانڑیں تعلقات ہن ، امریکہ دی مداخلت خطے اچ امن کیتے مددگار ثابت تھی سگدی اے ۔ خوشی اے جو صدر ٹرمپ صورت حال کوں ڈیکھدے ہوئیں مداخلت دا فیصلہ کیتے۔خمیس کوں وزیر اعظم عمران خان دی صدارت اچ کابینہ دے اجلاس دے بعد میڈیا نال گال مہاڑ کریندے ہوئیں وزیرخارجہ آکھیا جو وزیراعظم عمران خان اتے کابینہ بہترین خارجہ پالیسی اپناونڑ تے ایں کشیدہ صورت حال اچ بہترین سفارت کاری تے وزیر خارجہ تے وزارت خارجہ کوں مبارخ ڈتی اے ۔انہاں آکھیا اساں صدر ڈونلڈ ٹرمپ دے بیان دا خیر مقدم کریندوں۔ہک سوال دا جواب ڈیندے ہوئیں انہاں آکھیا رات میڈی سعودی عرب دے وزیر خارجہ نال گال تھئی انہاں پاکستان آونڑ دی خواہش دا اظہار کیتے جیں کوں میں خوش آمدید آکھیا تے اج سعودی وزیر خارجہ ولی عہد دا اہم پیغام گھن تے پاکستان آندے پن ۔اساں تاں پہلے ڈینھ توں اکھیندے پیوں جو اساں امن چاہندوں ۔اساں شروع ڈینھ توں اکھیندے رہ گیوں جو ہندوستان ولوں خطے اچ کشیدگی پیدا کرنڑ دی کوشش سیاسی مقاصد دے تحت اے ۔وزیر خارجہ آکھیا ہنڑ تاں بی جے پی دے لیڈر خود منی کھڑن جو پاکستان حدود اچ فضائی حملے نال اساکوں لوک سبھا اچ 22سیٹاں مل ویسن ۔