منی لانڈرنگ اچ ملوث لوک قومی مجرم ہین،کوئی رعایت دی بجائے سخت کارروائی دی امید رکھین،وزیراعظم عمران خان

اسلام آباد ۔ 20 فروری (اے پی پی) وزیراعظم عمران خان منی لانڈرنگ اچ ملوث لوکاں کوں قومی مجرم قرار ڈیندے آکھیے جو اینجھے لوک کہیں وی قسم دی رعایت دی بجائے سخت کارروائی دی امید رکھین،منی لانڈرنگ پاروں ہی ملک اوکھی مالی صورتحال دا شکار تھئے اتے قوم قرضیں وات آئی اے۔ اے گالھ وزیراعظم عمران خان اسلام آباد اچ منی لانڈرنگ روکنڑ کیتے کوششاں تے پیشرفت دا جائزہ گھنڑ بارے اجلاس نال خطاب کریندے آکھی۔ وزیر قانون ڈاکٹر فروغ نسیم، معاون خصوصی برائے احتساب شہزاد اکبر، ڈی جی آئی ایس آئی لیفٹیننٹ جنرل سیّد عاصم منیر احمد، سیکرٹری داخلہ، چیئرمین ایف بی آر، ڈی جی اے این ایف، ہوم سیکرٹریز اتے بئے سینئر حکام وی اجلاس اچ موجود ہن۔ سیکرٹری داخلہ وزیراعظم کوں منی لانڈرنگ روکنڑ کیتے اقدامات بارے ڈسایا۔ وزیراعظم آکھیا جو منی لانڈرنگ کرنڑ آلے کہیں رعایت دے مستحق کائنی،منی لانڈرنگ ملک کوں قرضیں وات کریندی اے اتے ملکی صورتحال سنگین تھئی اے،اینجھے لوکاں دے خلاف سخت ترین کارروائی کیتی ویسی۔انہاں ہدایت کیتی جو منی لانڈرنگ دے خلاف اقدامات تیز کیتے ونجن اتے ملزمان دے خلاف سخت کارروائی کیتی ونجے۔