اسلام آباد ۔ 27 فروری (اے پی پی) وزیراعظم عمران خان بھارت کوں ہک واری ول گالھ مہاڑ دی دعوت ڈیندے ہوئے آکھیے جواساں بھارت کوں ڈسا ڈتے جو اساں کوئی وی کارروائی کر سگدے ہیں،بھارت پاکستانی سرحد دی خلاف ورزی دا جواب ڈیکھ گھدے،اساں اوندے جہاز مار ڈھوائن اتے ہک پائلٹ وی ساڈے کولو اے،ہندوستان کوں تحقیقات دی مخلصانہ پیشکش کیتی اے،اے ساڈے فیدے اچ نئیں جو ساڈی زمین دہشتگردی کیتے یا کہیں بئے ملک دی سرزمین ساڈے خلاف استعمال تھیوے،جیکر کشیدگی ودھی تاں اے میڈے قابو اچ ہوسی نہ مودی دے ہتھ راہسی،چنگاں ہوسی جو بھارت عقل کوں ہتھ مارے کیوں جو ڈوہیں ملک خطرناک ہتھیاراں دے حامل ہین،کہیں غلط اندازے دے متحمل نئیں تھی سگدے،کوئی وی ملک کہیں بئے ملک کوں اے اجزت نئیں ڈیندا جو او اوندی سرحدی حدود دی خلاف ورزی کرے آپ ہی جج بنڑ تے فیصلے کرے۔ وزیراعظم عمران خان اے گالھ بدھ کوں قوم نال خطاب اچ آکھی۔ٹی وی تے خطاب اچ وزیراعظم بھارتی جارحیت توں بعد دی صورتحال تے قوم کوں اعتماد اچ گھندے ہوئیں آکھیے جو اساںپلوامہ واقعہ دے بعد بھارت کوں ہر قسم دی تحقیقات دی پیشکش کیتی،پلوامہ واقعہ اچ ہلاکتاں تھین اتے میکوں پتا اے جو انہاں دے ورثاءدا کیا ڈکھ ہوسی کیوں جو پاکستان اچ دہشت گردی دے خلاف جنگ اچ گذریل ڈاہ سالاں اچ 70 ہزار ہلاکتاں تھین اتے میں ایں دوران کئی ہسپتالاں اچ گیاں ،ہزاراں متاثرہ مریض ڈٹھین، انہاں دا ڈکھ ڈٹھے، جنگ اچ زخمی لوکاں دے لواحقین دا غم محسوس کیتے ،اساں ہندوستان کوں پیشکش کیتی اے جو تحقیقات تے آوے،پاکستان تیار اے،ساڈے اے مفاد اچ نئیں جو ساڈی زمین دہشت گردی کیتے استعمال تھیوے یا کہیں بئے ملک دی سرزمین پاکستان دے خلاف استعمال تھیوے،پلوامہ حملے دے بعد اساں تعاون کوں تیار ہاسے اتے اے وی ڈر ہا جو ہندوستان کوئی ایکشن گھنسی تہوں اساں آکھیے جو جواب ڈیونڑ ساڈی مجبوری ہوسی، ساکوں جوابی کارروائی کرنڑی پوسی، 26 فروری کوں بھارت دی کارروائی توں بعد میڈی آرمی چیف اتے ایئر چیف نال مشاورت تھئی اے،اساں تہوں ایکشن نئیں گھدا جو ساکوں پورا پتا نا ہا جو ایں کارروائی اچ کتنا نقصان تھئے،جیکر اساں ایکشن گھندے اتے ہندوستان دا جانی نقصان کرڈیندے جڈاں جو ساڈے پاسو کوئی نقصان نہ تھیندا،تہوں اساں فوری کارروائی نئیں کیتی۔وزیراعظم آکھیے جو ساڈا مقصد بھارت کوں اے ڈساونڑ ہا جو اساں کارروائی دی صلاحیت رکھیندے ہیں جیکر تساں ساڈے ملک اچ آتے کارروائی کر سگدے او تاں اساں وی کہیں توں گھٹ کائنی، بھارت کارروائی کیتی اے تاں اساں جواب ڈتے اتے تہاڈے جہاز ڈھوائن اتے ہک پائلٹ وی ساڈے کولو اے۔انہاں بھارت کوں آکھیے جو او عقل کوں ہتھ مارے،جیکر جنگ شروع تھئی تاں اوکوں مکاونڑ اوکھا تھی ویسی،پہلی اتے ڈوجھی جنگ عظیم وی ڈینہاں مہیناں توں کئی سالاں تئیں چلین،کیوں جو جیہڑے ہتھیار بھارت کولوہین اوہو جھیں پاکستان کولوں وی ہین،اساں ڈوہیں کہیں وی غلط اندازے دے متحمل نئیں تھی سگدے۔ انہاں ہک واری ول دعوت ڈتی جو بھارت پلوامہ واقعہ دے بعد دہشت گردی تے الواونڑ چاہوے تاں اساں تیار ہیں،ساکون ایں ویلھے مل بہہ تے گالھ مہار کرنڑ دی لوڑھ اے۔
