دبئی ۔ 10 فروری (اے پی پی)وزیراعظم عمران خان نال لبنان دے وزیراعظم سعد الدین رفیق الحریری دبئی اچ منعقدہ ورلڈ گورنمنٹ سمٹ دے موقع تے ملاقات کیتی۔ وزیراعظم آفس ولوں جاری بیان مطابق وزیراعظم عمران خان لبنان دے وزیراعظم کوں لبنان اچ نویں حکومت دے قیام تے مبارخباد ڈتی اتے لبنان اچ قومی حکومت دی کامیابی سانگے نیک خواہشات دا اظہار کیتا۔ ایں موقع تے وزیراعظم سعد حریری وزیراعظم عمران خان کوں انتخابات اچ کامیابی اتے وزیراعظم پاکستان دا عہدہ سانبھنڑ تے مبارخباد ڈتی ۔ لبنان دے وزیراعظم نال ڈوہائیں ملکاں دے دوستانہ اتے قریبی تعلقات داخصوصی ذکر وی کیتا گیا۔ رہنماواں ڈوہائیں ملکاں وچال سانجھی تجارت دے ودھارے دی ضرورت تے وی اتفاق کیتا۔ وزیراعظم عمران خان لبنانی کمپنیاں کوں پاکستان اچ سرمایہ کاری دی دعوت ڈتی۔ ڈوہائیں رہنماواں پاکستان اتے لبنان دی پارلیمنٹس دے سانجھا تعاون دی اہمیت تے وی زور ڈتا۔ وزیراعظم عمران خان آکھیا جو انہاں مشکل حالات اچ لبنان دی سلامتی اتے استحکام کوں یقینی بناونڑ سانگے لبنان دی حکومت دے اقدامات قابل قدر ہن اتے میں لبنان دی حکومت نال یکجہتی دا اظہار کرینداں۔
