راولپنڈی ۔ 4 فروری (اے پی پی) صوبائی وزیر صحت ڈاکٹر یاسمین راشد آکھیے جو پنجاب دے ہسپتالاں اچ مریضاں کوں بہترین طبی سہولتاں ڈیونڑ کیتے نواں نظام متعارف کرویندے پئے ہیں،ہرہسپتال دا میڈیکل سپرنٹنڈنٹ روزانہ دی بنیاد تے مریضاں کوں ڈتی ونجنڑ آلیاں طبی سہولتاں اتے بئے امور تے رپورٹ بھیجنڑ دا پابند ہوسی۔انہاں آکھیا جو کہیں وی ہسپتال اچ ڈاکٹریا پیرامیڈیکل سٹاف سودھے بیاں کہیں وی شئے دی کوئی کمی کائنی۔ اے گالھ انہاں ہولی فیملی ہسپتال راولپنڈی دادورہ کرنڑ ویلھے آکھی۔انہاں آکھیا جو ڈاکٹر مریضاں کوں ودھ توں ودھ سوکھ ڈیون۔ڈاکٹر یاسمین راشد ایمرجنسی ، لیبر روم ، آوٹ ڈور، ویٹنگ ایریا، آپریشن تھیٹراتے بئے شعبیاں دا وی معائنہ کیتا اتے میڈیکل سپرنٹنڈنٹ و ہسپتال دے افسراں توں موجودہ طبی سہولتاں بارے پچھیا ۔ انہاں زیر علاج مریضاں دا وی عیادت کیتی اتے مسائل پچھیے۔
