واشنگٹن ۔یکم فروری(اے پی پی)امریکادے صدر ڈونلڈ ٹرمپ افغانستان توں امریکی فوجاں دی واپسی کوں افغانستان اچ طالبان نال امن معاہدہ تھیونڑ نال مشروط کریندے آکھیے جیکر اے معاہدہ تھی گیا تاں افغانستان توں فوجاں کڈھ گھنسوں۔ٹرمپ دا بیان اون ویلے سامنڑےآئے جڈاں اے خبراں ہین جو ستارھاں سالاں دے افغان تنازعے کوں مکاونڑ کیتے امریکا اتے باغی گروپ امن سمجھوتے دے (فریم ورک) تے اتفاق کرگھدے۔ایندی تصدیق امریکی نمائندہ زلمے خلیل زادوی کیتی اے جو ڈوہاں فریقاں ”اصولی طورتے “ فریم ورک تے رضامندی ڈکھائی اے جیندے مطابق مختلف ملکاں دیاں دہشتگرد تنظیماں دے باغی،امریکا اتے ایندے اتحادیاں دے علاوہ افغانستان دے ہمسایاں دے خلاف حملیاں کیتے افغان سرزمین استعمال نئین کرسگدے۔ایں معاہدے دے بدلے امریکہ افغانستان توں فوجاں سڈ گھنسی۔ طالبان کیتے لازم ہوسی جو او جنگ بندی تے عمل درآمد کرن اتے افغان حکومت نال الواون۔ اے مذاکرات آندے مہینے وی جاری راہسن۔
