اسلام آباد ۔ 26 فروری (اے پی پی) پاکستان ایئرفورس پاکستان دی فضائی حدود اچ مداخلت دی بھارتی کوشش کوں ناکام بنڑا ڈتی۔ آئی ایس پی آر دے ڈائریکٹر جنرل میجر جنرل آصف غفوراپنڑے ہک ٹویٹ اچ آکھیے جو پاکستان ایئرفورس منگل دی سویل پاکستان دی فضائی حدود اچ داخل تھیونڑ آلے بھارتی لڑاکا جہازاں کوں فرار تھیونڑ تے مجبور کر ڈتا۔ میجر جنرل آصف غفور سویل6:36 وجے اپنڑے ٹویٹ اچ آکھیے جو بھارتی لڑاکا جہازمظفر آباد سیکٹرتوں لائن آف کنٹرول پارکر تے پاکستان دی فضائی حدود ا چ داخل تھئے۔ انہاں آکھیے جو پاک فضائیہ دے وختی اتے بھرپور ردعمل دے نتیجہ اچ بھارتی جہاز نس ونجنڑ تے مجبور تھی گئے اتے اپنڑاں پے لوڈ بالا کوٹ دے نیڑے سٹ تے فرار تھی گئے۔ انہاں آکھیے جو پے لوڈ ڈھونڑ دے نتیجہ اچ کہیں قسم دا کوئی جانی تے مالی نقصان نی تھیا۔ مسلح افواج دے ترجمان ایں توں پہلے سویل 4:42 منٹ تے اپنڑے ٹویٹ اچ آکھیا جو بھارتی فضائیہ لائن آف کنٹرول دی خلاف ورزی کیتی ہے۔ پاکستان ایئر فورس وختی ردعمل دا مظاہرہ کیتا جیندے تے بھارتی جہاز واپس نس گن ۔ ٹویٹ اچ ڈی جی آئی ایس پی آرایں بارے بی تفصیلات بعد اچ جاری کرنڑ دا آکھیے ۔ پلوامہ اچ بھارتی فوجی قافلے تے ہک مقامی نینگرولوں کیتے گئے حملہ دے بعد بھارت دی سیاسی اتے فوجی قیادت ولوں پاکستان تے حملہ دی دھمکیاں ڈتیاں ویندیاں پن اتے پاکستان دی فضائی حدود اچ بھارتی جہاز اں دا آونڑ اتے فضائی حدود دی خلاف ورزی انہاں دھمکیاں دے بعد کیتی گی ہے۔ پلوامہ اچ بھارتی فوجی دستے تے مقامی نینگراں مقبوضہ کشمیر اچ بھارتی فوجیاں دے جاری ظلم دے ردعمل دے طور تے کیتا ہا۔ وزیراعظم عمران خان گزریل منگل کوں اپنڑے ہک ٹی وی خطاب اچ بھارت کوں وارننگ ڈتی ہائی جوا وہ کہیں وی غلطی توں دور رہونڑ۔ انہاں آکھیا ہا جو جنگ شروع کرنڑ تاں آسان کم ہے لیکن ول ا یں تے کہیں دا کنٹرول نی راہندا جو ایں کو کیویں مکایا ونجے ۔ وزیراعظم عمران خان واضح انداز اچ آکھیے جو اساں بھارت دی ایجھی کہیں وی حرکت دا جواب ڈیونڑ سانگے صرف سوچسوں ہی کائناں بلکہ اساں اینداچنگا کرارا جواب ڈیسوں ، اساڈے کنوں چنگا جواب ڈیونڑ دے علاوہ کوئی بیا آپشن کائناں ہوسی ۔ وزیراعظم آکھیے جو پاکستان بھارت دے نال امن چاہندے اتے پلوامہ واقع نال کہیں قسم دا کوئی فائدہ حاصل نی کرنڑ چاہندا۔ انہاں کہیں قسم دے ثبوت تے تعاون دی پیشکش وی کیتی ہائی ،تاں جو بھارتی میڈیا دی مختلف رپورٹس مطابق لائن آف کنٹرول تے بھارت ودھ تعداد اچ فوجی ساز و سامان اتے فوجی منتقل کیتے ہن۔ بھارت الیکشن دے موقع تے پاکستان کوں سبق سکھاو نڑ چاہندے۔ چیف آف آرمی سٹاف جنرل قمر جاوید باجوہ لائن آف کنٹرول اتے ورکنگ باﺅنڈری تے مختلف فارمیشنز دا دورہ کیتا۔ سنوار کوں انہاں ایئر ہیڈ کوارٹرز دا دورہ کیتا اتے چیف آف ایئر سٹاف ایئر چیف مارشل مجاہد انور خان دے نال بھارتی دھمکیاں، پاکستان دے ردعمل اتے آپریشنل تیاریاں تے خیالیں دا تبادلہ کیتا۔ ڈوہائیں چیفس مسلح افواج دی تیاریاں اتے سانجھداری تے اطمینان دااظہار کیتے اتے آکھیے جو پاکستان دی مسلح افواج بھارت ولوں کیتی گی کہیں وی جارحیت یا غلطی دا کرارا جواب ڈیونڑ سانگے پوری طرح تیار ہن ۔
