راولپنڈی۔ 27 فروری (اے پی پی) پاک فوج دے ترجمان میجر جنرل آصف غفور ڈو بھارتی جنگی جہاز مار ڈھاونڑ تے 2 بھارتی پائلٹس دی گرفتاری دی تصدیق کریندے ہوئیں آکھیے جو پاک فضائیہ اپنڑی حد اچ رہندے ہوئیں بھارت دیاں4 جہیں تے 6 سٹرائیکس کیتن، پائلٹس فوجی اہداف اتے سپلائی ڈپوز کوں نشانہ بنڑا تے لاک کر ڈتا تے ولا محفوظ فاصلے تے کھلی جاہ تے اسٹرائیک کیتی، پاک فضائیہ اگر لاک کیتے گے اہداف کوں نشانہ بنڑیندی تاں ولا جانی ضیان تھیندا لیکن ہک مہذب اتے پیشہ وارانہ فوج ہوونڑ دے ناطے پاک فضائیہ ہدف دا نشانہ بنڑاونڑ دے باوجود تباہ کائنی کیتا ، پاکستان پرامن ملک اے لیکن بھارت کوں جواب ڈیونڑ دے علاوہ کوئی چارہ کائناں ہئی ،پورے اپریشن دے دوران پاک فضائیہ ایف 16طیارے استعمال ہی کائنی کیتے تاں بھارت ولوں ایف سولہ ڈھاونڑ دا دعوی کیویں درست تھی سگدے ،پاکستان دی فوج ڈے صلاحیت طاقت تے عوام دا ساتھ ہر قسم دی چیز موجود اے ،اساں ذمے وار رہنڑ چاہندوں تے جنگ دے پاسے نئی ونجنڑ چاہندے ، وزیراعظم پاکستان اتے عوام وی امن دا پیغام ڈتے ، اساں کہیں وی صورت خطے کوں جنگ دے پاسے نئی گھن ونجنڑ چاہندے ۔منگل کوں ڈی جی آئی ایس پی آر میجر جنرل آصف غفور میڈیا کوں بریفنگ ڈیندے ہوئیں ڈسائے جو سویلے توں لائن آف کنٹرول تے کجھ سرگرمی چلدی پئی اے جیں کوں سامنڑے رکھیندے ہوئیں پاک فضائیہ اپنڑے ٹارگٹ گھننڑ توں پہلے فیصلہ کیتا جو کوئی ملٹری ہدف کائناں گھدا ویسی ،ڈوجھا فیصلہ کیتا جو ٹارگٹ اچ کہیں انسانی زندگی دا ضیان نہ تھیوے ،اساڈے ایں فیصلے دا مقصد اے ہئی جو اساں ڈے جوابی صلاحیت موجود اے لیکن کوئی ایجھا کم نئی کرنڑ چاہندے جیرھا اساکوں غیر ذمے دار ثابت کرے ۔میجر جنرل آصف غفور آکھیا جو پاک فضائیہ بھمبر گلی، کے جی ٹو اتے ناریان دے علاقے اچ ڈپوز تے ٹارگیٹ لاک کیتا اساں حفاظتی فاصلہ رکھیندے ہوئیں ہدف کوں نشانہ بنڑیندے ہوئیں مجموعی طور تے چھی سٹرائیکس کیتیاں گن ،جیںد ا مقصد اے ہئی جو اساں سارا کجھ کر سگدوں لیکن ایں خطے دے امن کوں خراب نئیں کرنڑ چاہندے اساں ذمے وار رہنڑ چاہندوں ، وزیر اعظم اتے عوام وی امن دا پیغام ڈتے تے اساں کہیں وی صورت ایں خطے کوں جنگ دے پاسے نئی گھن ونجنڑ چاہندے ۔انہاںآکھیا جڈاں پاک فضائیہ ہدف گھن گھدے تاں ایندے بعد بھارتی فضائیہ دے 2 جہاز ہک واری ول ایل او سی دی خلاف ورزی کرتے اساڈے پاسے آئے، اساڈی فضائیہ تیار ہئی جیں دے نتیجے اچ ڈوہیں بھارتی جہاز ڈھہہ گے جیں اچوں ہک جہاز اساڈی تے ڈوجھا انہاں دے پاسے ڈٹھا، ایندے علاوہ وی ہک جہاز دے ڈھنڑ دی اطلاع اے لیکن ایندے نال ہی اساڈی انگیج منٹ کائنی تھئی۔ترجمان پاک فوج ڈو بھارتی پائلٹ دی گرفتاری دی تصدیق کریندے ہوئیں آکھیے جو بھارتی پائلٹ دے نال اساںمہذب ملک وانگوں سلوک کیتے۔ ہک زخمی پائلٹ کوں سی ایم ایچ منتقل کرڈتاتے ڈوجھا اساڈی حراست اچ اے ، پائلٹس توں کجھ دستاویزات وی مل گئن ۔انہاں آکھیا بھارت ایل او سی دی خلاف ورزی کیتی ،جواب ڈیونڑ دے علاوہ کوئی چارہ کائناں ہئی ،اساں ذمے وار ملک ہوں تے امن چاہندو ں ،جنگ دنیا دے کہیں وی مسئلے دا حل کائنی ۔
