پوری قوم سعودی ولی عہد شہزادہ محمد بن سلمان داوڈی شان نال استقبال کریسی ،وفاقی وزیر پٹرولیم غلام سرور خان

اسلام آباد ۔ 15 فروری (اے پی پی) وفاقی وزیر پٹرولیم ڈویژن غلام سرور خان آکھیے جوسعودی عرب دے ولی عہد شہزادہ محمد بن سلمان دا دورہ پاکستان معاشی ترقی، ڈو پاسے تعلقات کوں مزید مضبوط بنڑاونڑ تے سرمایہ کاری کیتے بہوں اہم اے ، پوری قوم سعودی ولی عہد دا شایان شان استقبال کریسی، دورے دے دوران آئل ریفائنری، پیٹرو کیمیکلز کمپلیکس اتے معدنیات دے شعبے اچ 10 ارب ڈالر توں ودھ دی سرمایہ کاری کیتے مفاہمت دیاں یادداشتاں تے دستخط تھیسن ‘ وزیراعظم سعودی عرب اتے یمن وچال ثالثی کیتے کردار ادا کرنڑ دی پیشکش کیتی اے ، ایران اتے سعودی عرب دے تعلقات کوں معمول تے گھن آونڑ کیتے کردار ادا کرنڑکوں تیار ہوں ، سعودی عرب دے ولی عہد دے بعد آندے مہینے ملائیشیا دے وزیراعظم پاکستان دا دورہ کریسن ، سابق حکمراناں قومی تعلقات دی بجائے ذاتی مفادات کیتے ذاتی تعلقات کوں پروان چڑھائے، قطر اضافی ایل این جی ڈیونڑ کیتے راضی اے، نجی شعبے کون وی ایل این جی درآمد کرنڑاچ سہولتاں ڈیسوں ‘ گیس بلاں اچ ودھارے دا آڈٹ تھیندا پئے ، سلیبز تے نظرثانی کیتی ویسی ۔اے گال انہاں جمعے کوں اتھاں صحافیوں نال غیر رسمی گال مہاڑ کریندے ہوئیں آکھی ۔ غلام سرور خان آکھیے جو پاکستان دہشت گردی دے خلاف جنگ اچ فرنٹ لائن سٹیٹ دے طور تے کردارادا کیتے تے سیکورٹی اہلکاراں سمیت 70 ہزار جاناں دا نذرانہ پیش کیتا ، ہنڑ ملک اچ دہشت گردی کوں کافی حد تئیں ختم کر ڈتا گے ، پاکستان ہک پر امن ملک اے ۔طالبان دے نال امریکہ دے مذاکرات اچ پاکستان اپنڑاں کردار ادا کریندا پئے ، ایران اتے سعودی عرب وچال وی تعلقات کوں معمول تے گھن آونڑ کیتے اہم کردار ادا کر سگدے‘ 16 اتے 17 فروری کوں سعودی ولی عہد دا پاکستان دا دورہ اے، 18 فروری کوں طالبان دا وفد وزیراعظم نال ملاقات کریسی ، برٹش ایئر ویز جون توں پاکستان اچ پروازاں شروع کرنڑ دا فیصلہ کیتے ، لفتھانسا اتے ایئر فرانس وی اتھاں پروازاں چلاونڑ دا سوچیندے پن ، ایں نویں پاکستان کوں وڈے عرصے بعد ہک دیانتدار قیادت نصیب تھئی اے ، جڈاں لیڈر دیانتدار ہووے تاں باہرلی دنیا دا اعتماد ودھ ویندے ۔انہاں آکھیا وزیراعظم عمران خان سعودی عرب اتے متحدہ عرب امارات، ترکی، ملائیشیا اتے چین دے دورے کیتن ، اے سارے چنگے دوست ملک ہن ، پچھلے مہینے متحدہ عرب امارات دے ولی عہد پاکستان آئے ہن تے ہنڑ سعودی عرب دے ولی عہد آندے پن، مارچ اچ ملائیشیا دے وزیراعظم پاکستان دا دورہ کریسن ۔سابق حکومت ولوں قطر توں ایل این جی دی درآمد دے معاہدے دے حوالے نال سوال دے جواب اچ انہاں آکھیا جو نیب ایں معاملے دی انکوائری کریندا پئے ، سپریم کورٹ وی اینکوں ڈیکھدی پئی اے ۔سابق وزیراعظم کو ںنوٹس ڈے ڈتا گئے ۔انہاں آکھیا چوراں تے ڈاکواں دا احتساب اپنڑی جاہ ہوسی ،اساں سارے دوست ملک تے اقوام عالم دے نال بہتر تعلقات کیتے کم کریندے پیوں ۔