وزیراعظم عمران خان دا چھاچھرو اچ صحت انصاف کارڈ تقسیم کرنڑ دے موقع تے عوامی کٹھ توں خطاب

چھاچھرو ۔ 08 مارچ (اے پی پی) وزیراعظم عمران خان آکھیے جو پاکستان دی مسلح افواج اتے عوام ہک مٹھ اتے تیار ہن، مادر وطن دی سالمیت، تحفظ اتے آزادی سانگے میں اتے میڈی قوم چھیکڑی دم تئیں لڑسن، اگر کوئی سمجھدے جو پاکستان تے حملہ کرتے اتھاں لہو وہیسن تاں پاکستان ایندا پورا جواب ڈیسی، انساناں دی تقسیم اتے نفرت دی سیاست تے یقین نی رکھیندے، پاکستان پرامن ملک ہے، پاکستان اچ رہونڑ آلیاں اقلیتاں برابر دی شہری ہن، نیشنل ایکشن پلان تے پوری طرح عملدرآمد تھیسی، بلاول دا پیو کرپشن اتے منی لانڈرنگ توں یوٹرن گھندے تاں اج مشکل اچ نہ ہوندے اتے نیب تے عدالتاں دے چکر نہ لیندے، بلاول دے پیو بلاول کو ں وی اوکھ پا ڈتے، وفاقی حکومت نال صوبہ دی بہتری سانگے جتنا تھی سگا کریسوں۔ انہاں خیالیں دا اظہار وزیراعظم جمعہ کوں تھرپارکر دے علاقہ چھاچھرو اچ صحت انصاف کارڈ تقسیم کرنڑ دے موقع تے ہک وڈے عوامی کٹھ توں خطاب نال کیتے۔ ایں موقع تے وزیر خارجہ شاہ محمود قریشی، گورنر سندھ عمران اسماعیل اتے ارباب غلام رحیم وی موجود ہن۔ وزیراعظم عمران خان آکھیا جو الیکشن دے بعد اوہ پہلی واری کہیں جلسہ نال خطاب کریندے پن ، اج تھرپارایں سانگے آئیاں کیونجو ایہ پاکستان دا سبھ توں پسماندہ علاقہ ہے، اتھاں 70 فیصد لوک غربت دی زندگی گزریندے پن ، مناسب خوراک نہ ملنڑ دی وجہ نال گزریل ترائے چار سالاں اچ اتھاں 1300 بال مر گن۔ وزیراعظم آکھیے اقتدار اچ آونڑ دا انہاں دا سبھ توں وڈا مقصد لوکیں دی غربت مکاونڑ سانگے اقدامات اتے کوششاں کرنڑ ہے، تھرپارکر اچ غربت دی شرح سبھ توں ودھ ہے ،ایں سانگے اتھاں آونڑ دا فیصلہ کیتے۔ وزیراعظم آکھیا جو 18ویں ترمیم دے بعد ڈھگ سارے اختیارات صوبیں کنوں ہن لیکن وفاقی حکومت توںجتنا تھیسی اوہ اساں کریسوں، انصاف ہیلتھ کارڈ وی ایںسلسلہ اچ ڈتا ویندا پئے، اج ہک لکھ 12 ہزار گھراں کوں ایہ کارڈ ڈتے ویسن، کارڈ نال غریب اتے پسماندہ لوکیں کوں اپنڑے علاج سانگے آسانی تھیسی، کارڈ تحت فی گھرانہ 7 لکھ 20 ہزار روپے تئیں دیاں سہولتاں ڈتیاں گن۔ وزیراعظم آکھیا جوتھرپارکر اچ 2 موبائل ہسپتال کم شروع کریسن، انہاںموبائل ہسپتالاں اچ آپریشن دی سہولت ہو سی جیرھاجو دور دراز علاقیں اچ خدمات سرانجام ڈیسن، ایندے علاوہ چار ایمبولینس گاڈیاں وی وختی ڈتیاں ویسن ۔ انہاں آکھیے جو تھر اچ کوئلہ دی شکل اچ کالا سونا پئے، جیویں جیویںسونا نکلسی تھرپارکر، سندھ اتے پاکستان دی تقدیر بدلدی ویسی ۔ انہاں آکھیا جو ماضی اچ جڈاںپسماندہ علاقیاں توں معدنیات ملدیاں ہن تاں پیسہ مقامی لوکیں تے خرچ کائنی تھیندا ہا،ہنڑ ایہ پالیسی مکمل طور تے بدل ڈتی گئی ہے، ہنڑ وسائل مقامی لوکاں تے خرچ تھیسن کیونجو اساں چاہندون جو غریب لوکیںکوں اگی تے گھن آﺅں ، تھرپارکر دے عوام پرامید رہونڑ، کوئلہ توں حاصل وسائل سبھ توں پہلے مقامی لوکیں تے ہی خرچ کیتے ویسن۔ وزیراعظم تھرپارکر اچ پانڑیں دے 100 پلانٹ لاونڑدا وی اعلان کیتا۔ انہاں آکھیا جو ریگستانی علاقہ ہونڑ دی وجہ نال اتھاں شمسی توانائی توں بجلی بنڑاونڑ دے ودھ سارے مواقع موجود ہن ، 100 پلانٹس کوں شمسی توانائی نال بجلی فراہم کیتی ویسی۔ ایندے علاوہ شمسی توانائی توں حاصل تھیونڑ آلی بجلی مقامی دیہات اچ وی ڈتی ویسی ۔ وزیراعظم آکھیاجو سپاسنامہ اچ جیرھا وی مطالبات کیتے گن انہاں کوں پورا کرنڑ دی کوشش کریسوں، سندھ حکومت کوں وی آکھسون جوا وہ عوامی فائدے سانگے اپنڑیاں ذمہ داریاں ادا کرنڑ۔ انہاں آکھیا جوتھرپارکر آونڑ دا ڈوجھا مقصد ایہ ہے جو اتھاں ادھی آبادی ہندو برادری دی ہے، بھارت اچ ایں ویلھا جو کجھ تھیندا پئے اتے اتھاں اقلیتاں کوں جیرھی مشکلات دا سامنڑاں ہے ا وہ افسوسناک ہے۔ اقوام متحدہ دی حالیہ رپورٹ اچ وی آکھیا گئے جو بھارت اچ اقلیتاں دے خلاف نفرت اتے تشدد اچ ودھارا تھیندا پئے ۔بھارتی حکومت اقلیتاں کوں تحفظ نی ڈیندی۔ وزیراعظم آکھیا جو اساڈی حکومت پاکستان اچ ہندو برادری اتے اقلیتاں نال کھڑی ہے، اقلیتاں تے کہیں قسم دا ظلم اتے تشدد کائناں تھیونڑ ڈیسوں، قائداعظم محمد علی جناحؒ میڈے رول ماڈل ہن، اوہ ہندو اتے مسلماناں کوں کٹھا کرتے انگزیر توں آزادی چاہندے ہن لیکن ہک ٹائم آیا جڈاں انہاں کوں ایہ پتہ لگا جو خدشہ موجود ہے جو کانگریس جیویں ہندوستان چاہندی ہے اتھاں اقلیتاں محفوظ کائنی ہوسن اتے انہاں کوں حقوق کائناں ملسن اتے بابائے قوم پاکستان بنڑاونڑ سانگے اپنریاں راہیں انج کر گھدیاں ، اج ہندوستان اچ مسلمان وی ایہ منیندے پن جو قائداعظم محمد علی جناحؒ جیرھا اقدامات کیتے ا وہ ٹھیک ہن، پاکستان ایں سانگے بنڑیا جو اقلیتاںمحفوظ ہونڑ،اساڈ افرض ہے جو اساںاقلیتاں دے حقوق دا تحفظ یقینی بنڑاﺅں، پاکستان اچ رہونڑ آلیاں اقلیتاں برابر دے شہری ہن، انہاں کوں پورے حقوق ملسن ۔پاکستان بھارتی پائلٹ کو ںرہا کرتے واپس بھیجے کیونجو اساں جنگ نی چاہندے، پلوامہ حملہ دے بعد وی اساڈ ا موقف ہا جو واقعہ دی تحقیقات اچ مدد سانگے تیار ہسے لیکن کہیں کوں غلط فہمی نی ہونڑ چاہیدی جو ایہ نوں پاکستان ہے۔ وزیراعظم آکھیا جو نیشنل ایکشن پلان تحت ساریاں سیاسی جماعتاں ا یہ فیصلہ کیتا ہا جو مسلح گروپاں کوں پاکستان اچ کم کرنڑ دی اجازت کائناں ڈیسوں ، دنیا دے کہیں ملک اچ ایجھا گروپاں کوں کم کرنڑ دی اجازت کائنی ہوندی ، جڈاں اساڈی حکومت آئی تاں اساں فیصلہ کیتا جو نیشنل ایکشن پلان تے پوری طرح نال عملدرآمد تھیسی ،اساں پاکستان دی بہتری چاہندوں ،تاںجو فلاحی کم کرنڑ آلے گروپاں کوں کوئی فکر نی تھیونڑ چاہیدی لیکن ایہ گالھ واضح تھیونڑ چاہیدی ہے جو پاکستان دی سرزمین کہیں دے خلاف استعمال کرنڑ دی اجازت کائناں ڈیسوں ۔ وزیراعظم آکھیے جو گزریل 10 سالاں اچ سندھ اچ جو کجھ تھئے اوہ ساریاں دے سامنڑے ہے، سندھ اچ 530 ارب روپے خرچ تھئے، 1500 ارب روپے ترقیاتی بجٹ ہا، ایہ کتھاں گئے عوام چنگی طرح واقف ہے ۔ انہاں آکھیا جو بلاول بھٹو اسمبلی اچ انگریزی اچ تقریر کیتی، انہاں کوں پتہ کائنی جو پاکستان اچ بہوں گھٹ لوک انگریزی سمجھدن، اسمبلی اچ انہاں جیرھی انگریزی بولی (ن) لیگ اتے جے یو آئی دے ودھ سارے لوکیں کوں ا وہ سمجھ نی آئی اتے اتنے گھبرائے جو غلط رخ تے نماز پڑھی۔ انہاں آکھیا جو وفاق کنوں ساڈھے پنج ہزار ارب روپے سالانہ ہوندن، ایندے اچ سالانہ 2 ہزار ارب روپے قرض دی قسطاں اچ ویندن ، اڈھائی ہزار ارب روپے صوبیں کوں ویندن، ایں سانگے 600 ارب روپے دے خسارہ نال اساں شروع کریندوں ۔ انہاں آکھیا جو سرمایہ کاری اچ ودھارا، ریونیو ودھاونڑ اتے ٹیکساں دے دائرہ کار اچ ودھارااچ چنگائی آوسی اتے جیرھا وی وسائل پیدا تھیسن ،اساڈی ہوسی جو سبھ توں پہلے تھرپارکر، جنوبی پنجاب اتے فاٹا ورگے پسماندہ علاقیاں تے خرچ کیتے ونجنڑ ۔