وفاقی وزیر پاور ڈویژن عمر ایوب خان دی صحافیاں نال گالھ مہاڑ

اسلام آباد ۔ 26 مارچ (اے پی پی) وفاقی وزیر پاور ڈویژن عمر ایوب خان بجلی دے شعبے اچ اصلاحات ،لائن لاسز اچ گھٹکی،بجلی چوراں دے خلاف کاروائی،ٹرانسمیشن لائناں دے نظام دی بہتری،سستی بجلی ڈیونڑ اتے بقایاں دی وصولی دی مہم تکھے کرنڑ دا عزم کریندیں ہوئیں آکھیا جو ایں سال 31 دسمبر تئیں گردشی قرضہ 225 ارب روپے تئیں آندا ویسی،، فیسکو، میپکو، کیسکو اتے لیسکو کو ںکارکردگی چنگی کرنڑ سانگے بئیا تقسیم کریسوں،گرمیاں اچ ودھ توں ودھ ضیان آلے فیڈرز تے لوڈ منیجمنٹ تھیسی،ملک دے بئی علاقیاں اچ لوڈشیڈنگ گھٹ رہسی،عالمی بینک دے تعاون نال ٹرانسفارمز تے میٹر لاونڑ دا فیصلہ کیتا گئے ،بلوچستان دے ٹیوب ویلز کوں شمسی توانائی تے منتقل کیتا ویسی،آزاد کشمیر کوں ہک روپے 10پیسے فی یونٹ واٹر یوزر چارجز ملسن۔اے گالھیں انہاں منگل کوں اتھاں صحافیاں نال گالھ مہاڑ کریندیں ہوئیں آکھی۔ایں موقع تے چیئرمین انرجی ٹاسک فورس ندیم بابر اتے وفاقی سیکرٹری پاور ڈویژن عرفان علی وی موجود ہن ۔عمرایوب خان آکھیا جو ایں ویلھے اساڈی بجلی دی پیداواری استعداد31ہزار میگاواٹ اے جئیں اچوں 60فیصد بجلی تیل گیس اتے کوئلہ،30فیصد پانڑی،6فیصد نیوکلیئر اتے 4فیصد قابل تجویز توانائی توں گھدی ویندی پئی اے۔