اسلام آباد ۔ 28 مارچ (اے پی پی) وزیر اعظم عمران خان آکھیے جو ساریاں رکاوٹاں کوں دور کرتے معاشرے دے گھٹ آمدنی آلے طبقات کیتے آندے مہینے نواں پاکستان ہاﺅسنگ منصوبہ شروع کیتا ویسی ،گھر بنڑاونڑ کیتے پرائیویٹ سیکٹر اتے نینگراں کوں موقع ڈیندے پیوں ،مالیاتی اداریں فاٹا اتے قبائلی علاقیں اچ ویہ گھر بنڑاونڑ کیتے فنانسنگ کرییسن ،کامیاب ”سونامی ٹری منصوبے“ وانگوں اپنڑاں گھر سکیم اچ وی اہداف حاصل کریسوں ، وفاقی دارالحکومت اچ کثیر المنزلہ عمارتاں کیتے سنگا پور اتے دبئی ماڈل اپنایا ویسی ،صرف اسلام آباد اچ 500ارب مالیت دی سرکاری زمین توں قبضہ چھڑا گھدے ،قبضہ کرنڑ آلیں دے خلاف فوجداری مقدمیں درج کیتے ویسن،کچی آبادیاں کوں ریگولرائز کرتے انہاں کوں رہنڑ کیتے گھر ،فلیٹ تے کمرشل سینٹرز ڈتے ویسن ۔او خمیس کوں اتھاں پاکستان ہاﺅسنگ کانفرنس نال خطاب کر یندے پے ہن ۔ ہاﺅسنگ ٹاسک فورس دے چیئرمین ضیغم رضوی ،ورلڈ بینک دے کنٹری ڈائریکٹر الینگوپیچ ہموتو ، پنجاب دے وزیر ہاﺅسنگ محمودالرشید دے علاوہ مختلف بینکاں ، کنسٹریکشن کمپنیاں ، رفاعی اداریں دے نمائندیں،انجینئرنگ یونیورسیٹاں دے شعبے انفراسٹرکچر ،انجنیئرنگ دے شعبے دے سربراہان تے پی ایچ ڈی دے طلباءتے غیر ملکی وفد وی تقریب اچ شریک ہن ۔وزیراعظم عمران خان تقریب توں خطاب کریندے ہوئیں آکھیے جو عالمی بینک دا شکریہ ادار کریندوں جیں پاکستان تحریک انصاف دے نواں پاکستان ہاﺅسنگ سکیم اچ تعاون کیتے پاکستان نال رابطہ کیتے تے فنڈز ڈیونڑ دا فیصلہ کیتے ۔انہاں آکھیا جو پاکستان اچ 50لکھ گھراں دی تعمیرہک وڈا ہدف اے اج توں پہلے کہیں حکومت عملی طور تے ایں طرز دا منصوبہ شروع کائنی کیتا ،ایں وقت پاکستان اچ ہک کروڑ گھراں دی کمی اے جیں کوں سامنڑے رکھیندے ہوئیں حکومت 50لکھ گھراں دا منصوبہ پیش کتے جیرھا جو ہک شاندار منصوبہ اے ،ایندے اچ مشکلات تاں ضرور آسن لیکن انہاں ساری مشکلات کوں دور کرتے اے منصوبہ لانچ کیتا ویسی ۔ایں موقع تے پاکستان اتے عالمی بینک دے درمیان رہائشی شعبے اچ تعاون کیتے مفاہمتی یادداشت تے دستخط کیتے گن ۔
