اسلام آباد ۔ 19 مارچ (اے پی پی) وفاقی وزیرخزانہ اسدعمر آکھیے جو انسانی وسائل دی ترقی تے سرمایہ کاری اہمیت دی حامل تے ملک دی ترقی اچ کلیدی حیثیت رکھیندی اے ۔انہاں اے گال منگل کوں اتھاں ہیومن کیپٹل سمٹ نال خطاب کریندے ہوئیں آکھی اے ۔ وزیرخزانہ آکھیے جو نینگراں کوں تعلیم ڈیونڑ اتے انہاں دی ترقی تے سرمایہ کاری بہوں ضروری اے ۔تعلیم تے انسانی وسائل دی ترقی تے سرمایہ کاری اصل اچ معیشت اچ سرمایہ کاری ہوندی اے کیوں جو ایندے نال اقتصادی فائدے دیاں مختلف جہتاں تے صورتاں پیدا تھیندن جیں نال مجموعی ملکی معیشت کوں فائدہ تھیندے ،حکومت کوں ایں صورت حال دا ادراک اے تے ایں مقصد دے حصول کیتے کم کرنڑ اچ پرعزم اے ۔وزیر خزانہ آکھیے جو انسانی ترقی تے غربت مکاونڑ کیتے اساکوں مالی اعداد شمار توں اتے ڈیکھنڑ دی ضرورت ہوندی اے ،گزریل کئی سالاں توں پاکستان اچ غربت دے خاتمے تے انسانی وسائل دی ترقی کیتے کوششاں کیتیاں ویندیاں پن ایہا وجہ اے جو اج دے معاشی اعداد شمار دی 20سال پہلے دے اعداد شمار توں بہتر اے تاں جو اے وی حقیقت اے جو دنیا دے بئے ملکاں اچ جیویں تکھے شرح نال ترقی تھئی اے پاکستان اچ ایں رفتار نال ترقی کائنی تھئی ۔ وزیرخزانہ آکھیے جو پاکستان غربت دے مسئلے نال نبرنڑ تے اینکوں مکاونڑ دے خاتمے کیتے کثیرالجہتی طریقہ کار آزمیسی، موجودہ حکومت پہلی واری سماجی تحفظ دیاں کوششاں کوں مربوط بنڑیندی پئی اے، غربت مکاونڑ کیتے مربوط طریقہ کار تے طرز عمل وضع کیتا ویندا پئے تے ایں مقصد کیتے ہک مقتدرہ دا قیام عمل اچ گھن آیا ویسی تاں جو انہاں آکھیے اساکوں اختراعی مالیاتی طریقیں کوں عملی شکل ڈیونڑ کیتے اقتصادی طور تے وسائل درکار ہن ۔وزیرخزانہ آکھیے جو اداریں دی ساخت اچ بہتری گھن آونڑ کیتے وی حکومت اقدامات کریندی پئی اے ، پبلک پرائیوٹ پارٹنرشپ اتھارٹی دا قیام عمل اچ گھن آیا گے ایندا مقصد فنڈز کوں بنیادی ڈھانچے اتے سماجی شعبے دی ترقی تے خرچ کرنڑکیتے نجی شعبے دے نال رل تے کم کرنڑاں اے ۔بعداچ صحافیاں نال گال مہاڑ کریندے ہوئیں انہاں آکھیے جو پاکستان دی معشیت کوں آزاد کرنڑ وقت دی ضرورت اے، معشیت کوں اصولاں تے ضوابط ، شفاف فیصلہ سازی، پارلیمان اتے نگرانی کوں مضبوط کرنڑ، شفافیت اتےاحتساب دے ذریعے اساں نہ صرف اپنڑی معیشت کوں ترقی ڈے سگدوں بلکہ معیشت کوں آزاد وی کر سگدوں۔
