اقوام متحدہ ۔ 29 مارچ (اے پی پی) پاکستان اقوام متحدہ دی انسداد دہشت گردی دی حکمت عملی کوںسیاست اچ ملوث کرنڑ کوں سخت تنقید دا نشانہ بنڑیندے ہوئیں آکھیے جو اے اقدام اقوام متحدہ دے انسداد دہشت گردی دے نظام دی سالمیت تے سمجھوتہ تصورتھیسی ۔ اقوام متحدہ اچ پاکستان دی مستقل مندوب ڈاکٹر ملیحہ لودھی اقوام متحدہ دی سلامتی کونسل نال خطاب اچ آکھیے جو فنانشل ایکشن ٹاسک فورس (ایف اے ٹی ایف) اتے ایں حوالے نال پابندیاں دے اقدامات کوں کہیں وی ملک دے اپنڑے جغرافیائی مقاصد دے حصول کیتے استعمال نئی کرنڑاں چاہیدا تے نہ ہی ادارے کوں سیاسی مقاصد کیتے پلیٹ فارم بنڑایا ونجے ۔ انہاں آکھیا جو عالمی ادارے کوں ودھ توں ودھ بااثر بنڑاونڑ کیتے فیصلہ سازی دے عمل اچ اپنڑے ارکان دی تعداد اچ ودھارا کرنڑ دی ضرورت اے ۔ ڈاکٹر ملیحہ لودھی دہشت گردی دی مالی معاونت دے تدارک اتے اینکوں مکاونڑ دے حوالے نال مباحثے توں خطاب کریندیاں پیاں ہن تے جیرھا جو سلامتی کونسل1267سینکشنز کمیٹی دی منظوری دے بعد امریکا ولوں سلامتی کونسل دے 15ارکان کوں بھیجی گی قرارداد دے بعد منعقد تھیا جیں اچ جیش محمد دے سربراہ مسعود اظہر کوں اقوام متحدہ دیاں پابندیاں دی بلیک لسٹ اچ شامل کرنڑدا مطالبہ کیتا گے ۔
