اسلام آباد ۔ 23 مارچ (اے پی پی)صدر مملکت ڈاکٹر عارف علوی آکھیے جو پاکستان بہوں اُچ جھک دے باوجوداپنڑے عزم، مہارت اتے حکمت عملی نال دہشتگردی تے قابو پاتے،اج اساں ابھردی معاشی قوت ہی نئیں دفاعی ایٹمی قوت وی ہیں،اساں امن چاہندے ہیں،ایکوں ساڈی کمزوری نہ سمجھیا ونجے،خطے اچ امن کیتے جنگ دے بجائے تعلیم اتے روزگار تے توجہ ڈیونڑی چاہیدی اے،ساڈی اصل جنگ غربت دے خلاف ہوونڑی چاہیدی اے،پوری قوم کوں یوم پاکستان مبارک۔صدر مملکت ڈاکٹر عارف علوی یوم پاکستان پریڈ نال خطاب اچ قوم کوں یوم پاکستان پریڈدی مبارک ڈیندےا ٓکھیے جو اج اساں اللہ دا شکر ادا کریندے ہیں جیں ساکوں آزادی دی نعمت ڈتی اے،23 مارچ ساڈی قومی تاریخ دا او ڈینہہ اے جیڑے ڈینہہ برصغیر دے مسلماناں قرار داد پاکستان پیش کیتی،قائد اعظم دی ولولہ انگیز قیادت مسلماناں اچ او روح بھر ڈتی جو کہیں وی قسم دے اوکھے حالات انہاں کوں ڈک نئیں سگدے۔صدر مملکت آکھیے جیویں آزادی دا حصول قربانی منگدے ایویں ہی ایکوں برقرار رکھنڑ کیتے وی کئی قربانیاں ڈیونڑیاں پوندن۔ساڈی تاریخ اچ کئی اچ جھک آئن،ساکوں جنگاںو ات سٹیا گئے،دہشتگردی دا سامنڑا کرنڑا پئے بھل اساں عزم، مہارت اتے حکمت عملی نال دہشت گردی دا مقابلہ کیتے انہاں کوں کامیاب نئیں تھیونڑ ڈتا،اساں قوم دے عزم اتے افواج پاکستان دی جرات و بہادری نال ہر میدان اچ سرخروتھئے ہیں اتے الحمداللہ اج اساں ابھردی ہوئی معاشی قوت دے نال نال ہک دفاعی ایٹمی قوت وی ہیں۔انہاں واضح کیتے جو اساں امن چاہندے ہیں، ساڈی ایں خواہش کوں کمزوری نہ سمجھیا ونجے، ساکوں جنگ دی بجائے لوکاں دی صحت، تعلیم، روزگار تے توجہ ڈیندے ہوئیں غربت مکاونڑ دی جنگ لڑنی چاہیدی اے۔ڈاکٹر عارف علوی آکھیا جو ہک جمہوری ملک ہوونڑ پاروں اساں جنگ تے یقین نئیں رکھدے ،امن چاہندے ہیں۔
