اسلام آباد ۔ 19 مارچ (اے پی پی) پاکستان تحریک انصاف دے سینیٹر فیصل جاوید چیئرمین پیپلزپارٹی بلاول بھٹو دے ٹویٹ تے پارٹی موقف ڈیندے ہوئیں آکھیے جو بلاول پاکستان دا منفی تصور پیش کریندے پن،اساڈے بہادر سپاہیاں عالمی امن سانگے جوکجھ کیتے بلاول ایں تے پانڑیں پھیرن چاہندن،پاکستان ساری دنیا کوںامن دا سنیہا ڈتے ۔ منگل کوں مرکزی میڈیا ڈیپارٹمنٹ ولوں جاری بیان مطابق سینٹر فیصل جاوید آکھیے جودہشت گردی دے کیخلاف جنگ اچ اساں 70 ہزار جاناں قربان کیتیاں،ایہ جنگ اساڈی جنگ کائنی ہائی،ول وی عالمی امن دی خاطر پاکستان 123 ارب ڈالرز دی مالی قربانی ڈتی۔ انہاں آکھیے جو پاکستان مخالف حلقیاں کوں خوش کرنڑ دی کوشش تے بلاول کوں شرم آونڑ چاہیدی ہے، بلاول قوم کوں ڈساونڑ جو اوہ کیندی زبان بولدے پن۔ سینٹر فیصل جاوید آکھیا جو ایہ نواںپاکستان ہے جیندے اچ گھٹیا تماشاں نال تساکوں کوئی فائدہ کائناں پجسی ۔ انہاں آکھیے جواساں امن پسند قوم ہسے اتے امن چاہندوں۔ انہاں بلاول بھٹو کو مخاطب کریندے ہوئیں آکھیے جو سندھ دی 70 فیصد آبادی غریب ہے 30 سالہ اقتدار اچ غربت دی چکی اچ پسیجنڑ آلے انہاں لوکیں سانگے تساں کیا کیتے۔ انہاں آکھیے جوبلاول یاد رکھنڑ جو پیپلز پارٹی ہنڑ ماضی دا قصہ بنڑ گئی ہے، بلاول اوں بندے کوں وی کٹہرے اچ کھڑا کرنڑ جیں انہاں دے باہرلے ملک خفیہ اکاونٹس دا سراغ لاتے۔ فیصل جاوید آکھیے جو بلاول دی جماعت پاکستان اچ ڈاکہ مارا اتے لوٹ مار دا مال باہر بھیجے۔
