اسلام آباد ۔ 22 مارچ (اے پی پی) ملائیشیا دے وزیراعظم ڈاکٹر مہاتیر محمد قومی معیشت کوں نقصانات توں بچاونڑ سانگے پاکستان کوں کرپشن روکنڑ دے شعبہ اچ تعاون دی پیشکش کریندے ہوئیں آکھیے جو کرپشن ملکاں دی ترقی دی راہ اچ سبھ توں وڈی رکاوٹ ہے، ایندا عوام دی سماجی تے اقتصادی ترقی تے منفی اثر پوندے۔ کرپشن روکنڑسانگے تعاون د ادائرہ کار بئے مسلم ملکاں تئیں وی ودھایا ویسی۔ جمعہ کوں وزیراعظم عمران خان دے کٹھے وزیراعظم ہاﺅس اچ پریس کانفرنس نال خطاب کریندے ہوئیں ملائیشیا دے وزیراعظم آکھیے جو عوامی عہدیداراں ولوں لٹی گئی رقم برآمد کیتی ونجنر چاہیدی ہے اتے ایہ اوہ عوام دی بہتری سانگے ترقیاتی بجٹ اچ استعمال تھیونڑ چاہیدی ہے۔ انہاں وزیراعظم عمران خان دے ایں وژن دی تائید کیتی جو کرپشن دی وجہ نال عوام غریب تھیندی ہے۔ ڈاکٹر مہاتیر محمد آکھیا جو اساںکرپشن مکاونڑ سانگے ہک بئے نال معلومات دا تبادلہ کر سگدوں،بئے مسلم ملکاں دے نال وی ایہ طریقہ کار شیئر کیتا ونج جا سگدے ،تاں جو انہاں دی ترقی کوں یقینی بناونڑ اچ مدد ملے۔ انہاں آکھیا جو ڈوطرفہ تعلقات دے علاوہ وزیراعظم دے نال مسلم امہ کوں درپیش مسئلیاں تے وی گالھ مہاڑ تھئی ۔انہاں آکھیا جو کرائسٹ چرچ حملے اچ 9 پاکستانی اتے 3 ملائیشین شہید تھئے،اساکوں انتہاءپسندی اتے اسلامو فوبیا مکاونڑ سانگے رل مل تے کم کرنڑ پوسی۔ مسلماناں بارے دنیا دی سوچ کوںبدلنڑ سانگے کوششاں کرنڑ لازمی ہن۔ انہاں آکھیا جو پاکستان آونڑ اتے یوم پاکستان دی تقریبات اچ شرکت انہاں سانگے وڈے اعزازآلی گالھ ہے۔ ایں موقع تے وزیراعظم عمران خان آکھیاجو یوم پاکستان پریڈ اچ مہمان اعزاز دی حیثیت نال شرکت سانگے ملائیشیائی ہم منصب دا دورہ پاکستان اساڈے کیتے فخر دی گالھ ہے۔ انہاں آکھیا جوڈاکٹر مہاتیر محمد مسلم دنیا سانگے ہک رول ماڈل دی حیثیت رکھیندن،جنہاں اپنڑے ملک دے عوام دا معیار زندگی چنگا کیتے۔ سیاست اچ انہاں دی واپسی کرپشن مکاونڑ دے حوالے نال ہک چنگا اقدام ہے، کرپشن خلاف انہاں دا موقف تعریف دے قابل ہے۔انہاں اسلامو فوبیا دے چیلنجز نال نبڑن سانگے موجودہ ماحول دے تناظر اچ ڈاکٹر مہاتیر کوں کردار اداکرنڑ دی گالھ تے زور ڈتا۔ وزیراعظم عمران خان پاک ملائیشیا بھرپی آلے تعلقات دی تعریف کریندے ہوئیں آکھیا جوڈوہائی ملکاں وچال براہ راست سرمایہ کاری سمیت مختلف شعبیںاچ تعاون تے گالھ مہاڑ تھئی ہے۔
